Նյու Դելիում Հայաստանի և Ռուսաստանի արտգործնախարարներ Արարատ Միրզոյանն ու Սերգեյ Լավրովն ընդգծել են հայ-ադրբեջանական հարաբերությունների կարգավորման բոլոր ուղղություններով ջանքերն ակտիվացնելու հրատապությունը։ Այս մասին հաղորդագրություն է տարածել ՌԴ ԱԳՆ-ը:
«Տեղի է ունեցել մտքերի փոխանակում տարածաշրջանային խնդիրների շուրջ: Ընդգծվել է հայ-ադրբեջանական հարաբերությունների կարգավորման բոլոր ուղղություններով ջանքերն ակտիվացնելու հրատապությունը՝ Ռուսաստանի, Հայաստանի և Ադրբեջանի ղեկավարների միջև 2020 թ. նոյեմբերի 9-ի, 2021 թ. հունվարի 11-ի, նոյեմբերի 26-ի և 2022 թ. հոկտեմբերի 31-ի պայմանավորվածություններին համապատասխան», – նշել են դիվանագիտական գերատեսչությունում։
ՌԴ ԱԳՆ-ում նաև հայտնել են, որ նախարարները քննարկել են երկկողմ օրակարգի արդիական հարցեր։
«Համադրվել են միջազգային հարթակներում համագործակցությունը խթանելու մոտեցումները՝ ընդհանուր ինտեգրացիոն միությունների շրջանակներում», – հավելել են ՌԴ ԱԳՆ-ում։
Ռուսաստանի արտաքին գերատեսչության փոխանցմամբ՝ բանակցություններն անցել են բարեկամական և վստահության մթնոլորտում, պայմանավորվածություն է ձեռք բերվել դիվանագիտական գծով հետագա շփումների մասին։
Հետևեք մեզ տելեգրամում
