Սաուդյան Արաբիայի արտգործնախարար Ֆայսալ բն Ֆարհան Ալ-Սաուդը հայտարարել է, որ Իրանի հետ դիվանագիտական հարաբերությունները վերականգնելու մասին համաձայնագիրը դեռևս չի նշանակում «երկու երկրների միջև բոլոր տարաձայնությունների լուծում»:
Սաուդական «Al Sharq Al Awsat» թերթին տված հարցազրույցում ասել է, որ երկու երկրների միջև դիվանագիտական հարաբերությունները վերականգնելու մասին համաձայնագիրը հաստատում է «տարաձայնությունները հաղորդակցության և երկխոսության միջոցով լուծելու կողմերի փոխադարձ ցանկությունը»:
«Մենք պատրաստվում ենք վերսկսել դիվանագիտական հարաբերությունները մեր երկրների միջև առաջիկա երկու ամսվա ընթացքում, և բնական է, որ մենք ապագայում փոխադարձ այցեր կկատարենք»,- շեշտել է Ֆայսալ բն Ֆարհանը:
Ինչ վերաբերում է երկու երկրների միջև առկա ակնառու տարաձայնություններին, Սաուդյան Արաբիայի ԱԳ նախարարն ընդգծել է, որ համաձայնագիրը «ծառայեց որպես տարաձայնությունները լուծելու փոխադարձ ցանկության վկայություն հաղորդակցության և երկխոսության, խաղաղ ուղիների և դիվանագիտական գործիքների միջոցով»:
Սաուդ արտգործնախարարը նաև մտահոգություն է հայտնել Իրանի միջուկային ծրագրի վերաբերյալ՝ կոչ անելով Ծոցի և Մերձավոր Արևելքի տարածաշրջանը զերծ պահել զանգվածային ոչնչացման զենքերից:
Հիշեցնենք, որ ուրբաթ Սաուդյան Արաբիան և Իրանը Չինաստանի միջնորդությամբ համաձայնագիր են կնքել կողմերի միջև դիվանագիտական հարաբերությունների վերահաստատման և դեսպանատների վերաբացման մասին:
Հետևեք մեզ տելեգրամում
