Տեսանելի ապագայում կարող է կազմակերպվել Իրանի և Սաուդյան Արաբիայի արտգործնախարարների հանդիպում։ Այս մասին հայտարարել է Իսլամական Հանրապետության արտգործնախարարության պաշտոնական ներկայացուցիչ Նասեր Քանանի Չաֆին, որի խոսքը մեջբերում է Nour News պորտալը։
«Երկու երկրի արտաքին գործերի նախարարների միջև ուղիղ բանակցությունների համար որևէ խոչընդոտ չկա, հանդիպման կազմակերպման գործընթացը կիրականացվի դիվանագիտական ուղիներով»,- հավելել է Քանանին։ Նա տեղեկություններ չի հաղորդել հանդիպման վայրի մասին, միայն նշել է, որ այդ հարցում արդեն պայմանավորվածություններ են ձեռք բերվել։
Իրանի արտգործնախարարության ներկայացուցիչն ընդգծել է նաև Իրաքի ու Օմանի դրական դերը Թեհրանի և Էր Ռիադի միջև հարաբերությունների կարգավորման հարցում։ Նրա խոսքով՝ ընդամենը մեկուկես տարվա ընթացքում Իրանի և Սաուդյան Արաբիայի միջև երկկողմ բանակցությունների ութ փուլ է անցկացվել, որից հինգը՝ Բաղդադում, երեքը՝ Մուսկատում։
Պեկինում մի քանի օր տևած բանակցություններից հետո Իրանի ու Սաուդյան Արաբիայի ներկայացուցիչներն ընդունեցին եռակողմ հայտարարություն, որում նշվում է, որ երկրները հավատարիմ են ինքնիշխանության և միմյանց ներքին գործերին չմիջամտելու սկզբունքներին, ինչպես նաև ծրագրել են վերսկսել համագործակցությունը առևտրի, տնտեսության, մշակույթի, գիտության և տեխնոլոգիաների ոլորտներում։ Կողմերը նախատեսում են նաև դեսպանատներ բացել երկու ամսվա ընթացքում։
Հետևեք մեզ տելեգրամում
