ԱՄԷ նախագահ շեյխ Մուհամմադ բին Զայեդը հայտարարել է, որ ժամանակն է դիվանագիտորեն մեկուսացված Դամասկոսին վերաինտեգրել արաբական աշխարհ:
«Սիրիան չափազանց երկար է բացակայել իր եղբայրներից, և եկել է ժամանակը, որ վերադառնա նրանց մոտ և արաբական աշխարհ»,-հայտարարել է շեյխ բին Զայեդը Սիրիայի նախագահ Բաշար ալ-Ասադի հետ՝ Աբու Դաբիի նախագահական պալատում կայացած հանդիպման ժամանակ:
Շեյխ բին Զայեդը հավելել է, որ Արաբական Միացյալ Էմիրությունները «հոգով և սրտով Սիրիայի կողքին է» լինելու և շարունակելու է համերաշխություն ցուցաբերել և աջակցել Սիրիայի կառավարության ջանքերին՝ պատերազմի և երկրաշարժի հետևանքների հաղթահարման հարցում:
Իր հերթին Բաշար ալ-Ասադը նշել է, որ Էմիրությունների դիրքորոշումը մշտապես եղել է ռացիոնալ, իսկ Մերձավոր Արևելքում նրա դերը բնութագրել է որպես դրական և արդյունավետ արաբական երկրների միջև ամուր հարաբերությունների ապահովման գործում:
Ասադի խոսքով՝ Էմիրությունների նման դերը հատվում է Սիրիայի տեսլականի հետ՝ արաբական երկրների հետ երկկողմ հարաբերությունների ամրապնդման անհրաժեշտությունից ելնելով:
Նշենք, որ վերջին տարիներին արդեն երկրորդ անգամ է, ինչ Սիրիայի նախագահը մեկնում է Արաբական Միացյալ Էմիրություններ: Առաջին անգամ նա մեկնել էր ԱՄԷ 2022 թվականի մարտին: Սա Սիրիայի նախագահի առաջին այցն էր սիրիական ճգնաժամի մեկնարկից ի վեր:
Հետևեք մեզ տելեգրամում
