Շուտով արաբական երկրների միջև անզիջում մրցավազք է սկսվելու Սիրիան վերականգնելու հարցում: Նման տեսակետ է հայտնել արաբագետ Արմեն Պետրոսյանը՝ մեկնաբանելով Սիրիայի նախագահ Բաշար ալ-Ասադի այցն ԱՄԷ:
Փորձագետը հիշեցրել է, որ սիրիական ճգնաժամի մեկնարկից ի վեր անցած 12 տարիների ընթացքում Բաշար ալ-Ասադը երկրորդ անգամ է արաբական երկիր այցելում և դարձյալ Արաբական Միացյալ Էմիրություններ։
Պետրոսյանը նկատել է, որ ալ-Ասադին դիմավորել են ամենաբարձր մակարդակով. նրա ինքնաթիռը երկնքում ուղեկցվել է ԱՄԷ ռազմական օդանավերով, իսկ Սիրիայի առաջնորդին դիմավորել է անձամբ ԱՄԷ նախագահ շեյխ Մուհամմադ բին Զայեդը:
Արաբագետը հավելել է, որ ներկայումս Սիրիայի իշխանությունների գերխնդիրը տևական պատերազմից հետո երկիրն արագ ոտքի կանգնեցնելն է: Այս համատեքստում շուտով հատկապես արաբական երկրների միջև անզիջում մրցավազք է սկսվելու Սիրիան վերականգնելու հարցում։
«Ի դեպ, Հայաստանը, հայկական շինարարարական ընկերությունները և այլ ոլորտների տնտեսվարողները ևս կարող են հնարավորություն ունենալ՝ մասնակցելու Սիրիայի վերականգնման գործընթացին՝ ընդլայնելով իրենց գործունեության աշխարհագրական արեալը»,- շեշտել է Պետրոսյանը:
Հետևեք մեզ տելեգրամում
