Իրանական մեդիա տիրույթում շարունակվում են քննարկումները վերջերս Թել Ավիվում Ադրբեջանի դեսպանատան բացման առնչությամբ:
Կապանում Իրանի հյուպատոսության բացումը և Արաքսում ԻՀՊԿ զորավարժությունների անցկացումը ցույց են տալիս, որ Թեհրանն այլևս չի կարող Բաքվի հանդեպ չեզոք դիտորդ լինել: Նման կարծիք է ներկյացվել «Shargh» օրաթերթում հրապարակված հոդվածում:
Հոդվածում նշվել է, որ Իրանի գործողությունները Ադրբեջանի հետ պատերազմ չեն նշանակում, սակայն ցույց են տալիս, որ Թեհրանը իր ազգային անվտանգության ու շահերի հարցում որևէ տարածաշրջանային կամ արտատարածաշրջանային դերակատարի հետ հաճոյախոսություններ չի անում:
Ավելացվել է նաև, որ Իսրայելում խորացող ճգնաժամը վարչապետ Նեթանյահուին ստիպել է իր իշխանությունը պահելու համար մարդկանց ուշադրությունը շեղել արտաքին թշնամու վրա։ Բացի այդ՝ Թել Ավիվի հրահրմամբ լարվածություն է ստեղծվել Ադրբեջանի և Իրանի հարաբերություններում։
Հոդվածում ասվել է, որ Իրանի և Պարսից ծոցի երկրների հարաբերությունների բարելավման ֆոնին Կովկասում Ադրբեջանն է լարվածություն ստեղծում Թեհրանի հետ։
«Իրանն առաջնորդվում է հարևանության քաղաքականությամբ, սակայն Բաքվի գործողությունները ստիպել են, որ Իրանն այլ կերպ խոսի Կովկասի վերաբերյալ»,- ընդգծվել է հոդվածում:
Հետևեք մեզ տելեգրամում
