Այս շաբաթ կայանալու է Իրանի և Սաուդյան Արաբիայի արտգործնախարարներ Հոսեյն Աբդոլլահիանի և Ֆայսալ բին Ֆարհանի հանդիպումը՝ նախորդ ամիս ձեռք բերված համաձայնագիրը կյանքի կոչելու համար: Տեղեկությունը փոխանցում է սաուդական «Asharq Al-Awsat» թերթը՝ հղում կատարելով անանուն աղբյուրին:
Աղբյուրի տեղեկացմամբ՝ հանդիպումը տեղի է ունենալու ուրբաթ Չինաստանի մայրաքաղաք Պեկինում:
Աղբյուրը նշել է, որ արտգործնախարարների հանդիպման վայր ընտրվել է Պեկինը՝ «ընդլայնելու Չինաստանի դրական դերը երկու երկրների միջև համաձայնության հասնելու և հաղորդակցության դյուրացման համար»:
Նշենք, որ նախորդ ամիս Չինաստանի միջնորդությամբ Իրանն ու Սաուդյան Արաբիան համաձայնության են եկել դիվանագիտական հարաբերությունների վերականգնման և դեսպանատների աշխատանքի վերագործարկման շուրջ: Երկու երկրների արտգործնախարարները նաև մի քանի հեռախոսազրույցներ են ունեցել:
Հետևեք մեզ տելեգրամում
