ԱՄՆ պետքարտուղար Էնթոնի Բլինքենը Հայաստանի և Ադրբեջանի ԱԳ նախարարների հետ եռակողմ հանդիպումից հետո շնորհակալություն է հայտնել երկու երկրների պատվիրակություններին տևական խաղաղության հասնելուն ուղղված ծանր աշխատանքի համար։
Բլինքենը շեշտել է, որ ինքը և ԱՄՆ նախագահի՝ ազգային անվտանգության հարցերով խորհրդական Ջեյք Սալիվանը գնահատում են այն ժամանակը, որ գործընկերները կարողացան անցկացնել Վաշինգտոնում։ Նա նշել է համաձայնություն ձեռք բերելու ընդհանուր նպատակին հասնելու հարցում առաջընթացը։
Բլինքենի խոսքով՝ կողմերը որոշ լրացուցիչ հոդվածների շուրջ համաձայնության են հասել, խորացրել են այլ չլուծված հարցերի շուրջ դիրքորոշումների ըմբռնումը, ինչպես նաև ընդունել են, որ վերջնական համաձայնության հասնելու համար դեռ դժվար աշխատանք կա անելու:
«Կարծում եմ, որ բոլորի կողմից կա նաև հստակ ըմբռնում, որ որքան ավելի ես մոտենում համաձայնության հասնելուն, որոշ դեպքերում դա ավելի դժվար է դառնում, որովհետև, որպես կանոն, ամենադժվար հարցերը թողնում են վերջում։ Բայց ես մեծապես գնահատում եմ այն անկեղծությունը, բացությունն ու անմիջականությունը, որ բոլորը դրսևորեցին։ Դա է, ի վերջո, փոխըմբռնման և, վերջապես, համաձայնության հասնելու ճանապարհը։ Շնորհակալություն երկուսիդ էլ՝ այստեղ լինելու համար։ Շնորհակալություն այս 3 օրվա ընթացքում կատարած քրտնաջան աշխատանքի համար։ Շնորհակալություն արձանագրված առաջընթացի համար և շնորհակալություն այս ջանքերն առաջիկա շաբաթներին և ամիսներին շարունակելու վճռականության համար», – նշել է ԱՄՆ պետքարտուղարը:
Էնթոնի Բլինքենն իր խոսքում նաև հիշեցրել է Եվրոպական միության գործընկերների հետ կայացած հանդիպումների մասին, այդ թվում նաև՝ ՀՀ վարչապետ Նիկոլ Փաշինյանի ու Ադրբեջանի նախագահ Իլհամ Ալիևի մակարդակով։ Նա նշել է, որ մի քանի շաբաթից նոր հանդիպում է սպասվում ԵՄ միջնորդությամբ։
Բլինքենի խոսքով` պետք է օգտվել այն առաջընթացից, որին հնարավոր է եղել հասնել այդ հանդիպումների ընթացքում։
Հետևեք մեզ տելեգրամում
