Թավրիզում ՀՀ հյուպատոսության բացումը կարող է ազարիաբնակ շրջաններում բարձրացնել Հայաստանի հեղինակությունը: Նման տեսակետ է հայտնել իրանցի միջազգայնագետ Էհսան Մովահեդիանը՝ Irdiplomacy վերլուծական կայքին տված հոդվածում:
Մովահեդիանի խոսքով՝ Թավրիզում ՀՀ հյուպատոսության բացումը քաղաքական առաջընթաց կլինի երկու երկրների հարաբերություններում: Այն կօգնի Հայաստանի և Թեհրան-Երևան հարաբերությունների վերաբերյալ ճիշտ տեղեկություններ ներկայացնել մի միջավայրում, որտեղ այս հարաբերությունների նկատմամբ կարող է լինել որոշակի էթնիկական զգայունություն:
Փորձագետն ընդգծել է, որ Հայաստան-Իրան սահմանը միշտ անվտանգ է եղել, և երկու երկրները երբևէ միմյանց համար սպառնալիք չեն ներկայացրել: Այս համատեքստում Հայաստանի հյուպատոսարանը տեղական իշխանությունների հետ,այդ թվում՝ ուրբաթօրյա աղոթապետերի, քաղաքական և հասարակական գործիչների հետ շփումներով կարող է նվազեցնել որոշ մարտահրավերներ և Հայաստան-Իրան հարաբերությունների, համընկնող շահերի վերաբյալ ճիշտ ըմբռնում ձևավորել:
Մովահեդիանը նշել է նաև, որ հյուպատոսության բացումը կարևոր է նաև մշակութային առումով՝ հաշվի առնելով տեղում հայկական համայնքի ու հայկական մշակութային ժառանգության առկայությունը:
Իրանցի միջազգայնագետը անհրաժեշտություն է համարել Հայաստանի հյուպատոսության բացումն այն առումով, որ այս քաղաքում արդեն ներկայացուցչություններ ունեն Թուրքիան և Ադրբեջանը:
Նրա խոսքով՝ հյուպատոսությունը կարող է նպաստել երկու ժողվուրդների միջև շփումների ակտիվացմանն ու հանրային դիվանագիտության ամրապնդմանը:
Հետևեք մեզ տելեգրամում
