Իսրայելի արտգործնախարար Իսրայել Կացը կարգադրել է Թուրքիայի փոխդեսպանին խիստ բողոքի նոտա հղել:
Նրա խոսքով՝ սա պատասխան է Թուրքիայի նախագահ Ռեջեփ Թայիփ Էրդողանի հայտարարություններին, ով հայտարարել էր, թե «Իսրայելի վարչապետ Բենիամին Նեթանյահուին պետք է ուղարկել Ալլահի դատաստան»՝ Գազայի հատվածի շուրջ տեղի ունեցող իրադարձությունների համատեքստում։
«Կարգադրել եմ կանչել Թուրքիայի փոխդեսպանին՝ խիստ նկատողություն անելու Էրդողանի՝ Նեթանյահուին Ալլահի մոտ ուղարկելու սպառնալիքների համար»,- X-ում գրել է Իսրայելի արտգործնախարարը:
Միևնույն ժամանակ արտգործնախարարը կարծիք է հայտնել, որ թուրքական կողմը, պաշտպանելով ՀԱՄԱՍ-ին, «աջակցում է վայրագություններին և մարդկության դեմ հանցագործություններին», և, հետևաբար, թուրքական «կողմը իրավունք չունի Աստծո մասին խոսել»:
«Լռե՛ք և ամաչե՛ք», – եզրափակել է արտգործնախարարը:
Նշենք, որ օր առաջ Էրդողանը, ելույթ ունենալով Կայսերի քաղաքում անցկացված նախընտրական հանրահավաքում, ասել էր, որ Նեթանյահուին թողնում է Աստծո դատին և համոզմունք հայտնել, որ Իսրայելի վարչապետին երկնային պատիժ է սպասվում։
Հետևեք մեզ տելեգրամում
