Պակիստանի բանակի ղեկավար, ֆելդմարշալ Ասիմ Մունիրը Իրանի իշխանություններին կոչ է արել նպաստել Եմենի հութիների կողմից Սաուդյան Արաբիայի և դրա էներգետիկ ենթակառուցվածքների դեմ հարձակումների դադարեցմանը։ Այս մասին հայտնում է «Financial Times»-ը։
Մունիրը վերջին շրջանում մի քանի անգամ այդ հարցը բարձրացրել է Իրանի ղեկավարության հետ շփումներում՝ մատնանշելով Պակիստանի և Սաուդյան Արաբիայի միջև գործող փոխադարձ պաշտպանության համաձայնագիրը։ Միաժամանակ նա կոնկրետ սպառնալիքներ չի ներկայացրել Իրանի հասցեին։
Պակիստանցի պաշտոնյաներից մեկի խոսքով՝ Իրանը հութիների և Սաուդյան Արաբիայի միջև հակամարտությունը ներկայացնում է որպես երկկողմ խնդիր և պնդում, որ հութիները գործում են անկախ։
Հիշեցնենք, որ Պակիստանը, Սաուդյան Արաբիան և Թուրքիան անցած ամիս ընդլայնել են ռազմական համագործակցությունը՝ ստորագրելով փոխադարձ պաշտպանության համաձայնագիր։ Համաձայնագրի շրջանակում կողմերը հայտարարել են, որ երկրներից մեկի նկատմամբ ռազմական ագրեսիան կդիտարկվի որպես ագրեսիա մյուս երկու երկրի դեմ։ Սաուդյան Արաբիան մինչ այժմ հրապարակայնորեն չի դիմել Պակիստանին կամ Թուրքիային՝ հութիների դեմ ռազմական աջակցություն տրամադրելու խնդրանքով։
Հավելենք, որ Իրանի աջակցությունը վայելող հութիների և Սաուդյան Արաբիայի միջև 2022 թվականին հաստատված հրադադարից հետո հակամարտությունը կրկին սրվել է։ Վերջին ամիսներին հութիները հայտարարել են Սաուդյան Արաբիայի նավահանգիստների շրջափակման մասին և հարձակումներ իրականացրել սաուդական էներգետիկ ենթակառուցվածքների դեմ։ Միաժամանակ Սաուդյան Արաբիան և նրան աջակցող Եմենի կառավարական ուժերը շարունակում են ռազմական գործողությունները հութիների դեմ։
Հետևեք մեզ տելեգրամում
