Վրաստանի վարչապետ Իրակլի Կոբախիձեն հանդիպել է ԱՄՆ պետքարտուղարի Եվրոպայի և Եվրասիայի հարցերով օգնական Ջիմ Օ՛Բրայենի հետ: Տեղեկությունը փոխանցում է Վրաստանի կառավարությունը:
Տեղի է ունեցել երկարատև հանդիպում, որի ընթացքում կողմերը անկեղծ զրույց են ունեցել վրաց-ամերիկյան հարաբերությունների բոլոր հարցերի, այդ թվում՝ Վրաստանում վերջին մի քանի տարիների ընթացքում զարգացած գործընթացների շուրջ։ Վրաստանի վարչապետն ու ԱՄՆ պետքարտուղարի օգնականը կիսել են իրենց մտահոգություններն այս գործընթացների վերաբերյալ։
Իրակլի Կոբախիձեն Ջիմ Օ’Բրայենին մեկնաբանել է նաև «Օտարերկրյա ազդեցության թափանցիկության մասին» օրենքի ընդունման անհրաժեշտությունը և ընդգծել, որ անհրաժեշտ է ուշադիր դիտարկել միջազգային գործընկերների բոլոր իրավական մեկնաբանությունները: Նա նշել է, որ Վրաստանի կառավարությունը շահագրգռված է ԱՄՆ-ի հետ գործընկերության խորացմամբ, ինչը պահանջում է փոխադարձ ջանքեր և արդար հարաբերություններ։
Նշենք, որ ավելի վաղ Իրակլի Կոբախիձեն Ջիմ Օ’Բրայենի այցի հետ կապված հայտարարել էր, որ իշխող «Վրացական երազանքի» պատվավոր նախագահ Բիձինա Իվանիշվիլիի հետ հանդիպման խնդրանք է եղել, որը մերժվել է՝ պատճառաբանելով, որ Իվանիշվիլին չի կարող որևէ հանդիպում անցկացնել շանտաժի ու պատժամիջոցների սպառնալիքով։
Հետևեք մեզ տելեգրամում
