ԱՄՆ Պետդեպից Թուրքիայի պետական Anadolu գործակալության թղթակցին մեկնաբանել են Թուրքիայի և Հայաստանի միջև կարգավորման գործընթացի վերջին հանդիպումը։
Թուրքական ԶԼՄ-ների փոխանցմամբ՝ խոսնակը նշել է․ «Գոհունակությամբ ենք ընդունում/ողջունում ենք Թուրքիայի և Հայաստանի միջև այս հանդիպումը։ ԱՄՆ-ն Թուրքիա-Հայաստան կարգավորման գործընթացը տեսնում է որպես դրական քայլ Հրվ․ Կովկասում խաղաղություն ու կայունություն հաստատելու կետում»։
Հիշեցնենք, որ Հայաստանի և Թուրքիայի սահմանին տեղի ունեցած վերջին հանդիպումից հետո, որը թվով 5-րդն էր, Երևանն ու Անկարան նույնաբովանդակ հայտարարություն տարածեցին՝ նշելով, որ ընդգծել են կարգավորման գործընթացն առանց որևէ նախապայմանի շարունակելու պայմանավորվածությունը՝ երկու երկրների միջև լիարժեք կարգավորման վերջնական նպատակին հասնելու համար, ինչպես նաև վերահաստատել են նախորդ հանդիպումների ընթացքում ձեռք բերված պայմանավորվածությունները։
Հայտարարվեց նաև, որ Ռուբեն Ռուբինյանն ու Սերդար Քըլըչը պայմանավորվել են տարածաշրջանային զարգացումներին համապատասխան գնահատել տեխնիկական կարիքները, որոնք հնարավորություն կընձեռեն գործարկել Ախուրիկ/Աքյաքա երկաթուղու սահմանային անցակետը, ինչպես նաև փոխադարձաբար դյուրացնել վիզայի ընթացակարգերը դիվանագիտական/պաշտոնական անձնագրեր ունեցողների համար։
Հետևեք մեզ տելեգրամում
