Վրաստանում առաջին անգամ դատարանը չեղյալ է հայտարարել 30 ընտրատեղամասում իրականացված խորհրդարանական ընտրությունների արդյունքները։ Թեթրիծղարոյի շրջանային դատարանի դատավորը բավարարել է «Վրաստանի երիտասարդ իրավաբանների ասոցացիայի» հայցը՝ հաստատելով, որ խախտվել է քվեարկության գաղտնիությունը։ Դատարանում ստուգվել են Ծալկայի և Թեթրիծղարոյի մի քանի տեղամասի քվեաթերթիկներ, որտեղ հաստատվել է, որ քվեաթերթիկի հետևի մասում հետք է երևում, ինչն էլ քվեարկության գաղտնիության իրավունքի խախտում է։ Այս ընտրատեղամասերում քվեարկությունն իրականացվել է էլեկտրոնային տեխնոլոգիայով։
Վրաստանում Գորիի շրջանային դատարանը նույնպես բավարարել է արդար ընտրությունների պահանջը և ընտրատարածքային ընտրական հանձնաժողովին հանձնարարել հաշվել 15 ընտրական տեղամասի անվավեր քվեաթերթիկները։ Սա 2-րդ դեպքն է Թեթևիծղարոյից հետո, երբ դատարանը բավարարում է ընտրությունների արդյունքները վիճարկող հայց։ Այս անգամ դատարան էր դիմել ISFED-ը՝ անվավեր քվեաթերթիկների վերահաշվարկի պահանջով։
Վրաստանի ԿԸՀ-ն Վերաքննիչ դատարանում բողոքարկելու է Թեթրիծղարոյի և Գորիի շրջանային դատարանների որոշումները։ ԿԸՀ-ն չհիմնավորված է համարում Թեթրիծղարոյի շրջանային դատարանի որոշումը և համաձայն չէ ընտրատեղամասերի արդյունքները չեղյալ հայտարարելու որոշման հետ։ Կառույցն արդեն բողոքարկել է Գորիի շրջանային դատարանի որոշումը՝ հավելելով, որ ոչ մի միջազգային կազմակերպության եզրակացություն չի հաստատել ընտրության գաղտնիության խախտումը։
Հետևեք մեզ տելեգրամում
