Թբիլիսիում ուժայինները գիշերը ջրցան մեքենաներ են կիրառել ակցիայի մասնակիցներին ցրելու համար։ Իրավապահ մարմինների և ցուցարարների միջև բախումներ են եղել, կան վիրավորներ։ Ցուցարարները բարիկադներ են կառուցել Ռուսթավելի պողոտայում, ուժայինները, շարքեր կազմած և հատուկ միջոցների կիրառմամբ, ցուցարարներին ցրելու գործողություններ են իրականացրել։
Վրաստանի խորհրդարանում հայտարարված է անվտանգության կարմիր մակարդակ․ շենք թույլ չեն տալու մտնել ոչ ոքի, բացառությամբ նրանց, ում կթույլատրի խորհրդարանի նախագահը՝ հաշվի առնելով սպառնալիքի առանձնահատկությունը և դրանից խուսափելու անհրաժեշտությունը։
Ավելի վաղ ՆԳՆ-ն հայտարարել էր, որ վիրավորներ կան ոստիկանների շարքում։ Կառույցից հայտարարություն էին տարածել, որ խորհրդարանի հարևանությամբ հանրահավաքն անցկացվել է սահմանված նորմերի խախտումով, ինչի պատճառով ոստիկանությունը դիմել է «օրենքով սահմանված միջոցների»։
Այս պահին հայտնի չէ, թե Ռուսթավելի պողոտայում հանրահավաքի ժամանակ քանի մարդ է բերման ենթարկվել, քանիսն են վիրավորվել։ Ընդդիմության առաջնորդները կոչ են անում բոլոր նրանց, ովքեր համաձայն չեն իշխանությունների որոշմանը, ուրբաթ օրը ժամը 19:00-ին կրկին հավաքվել Թբիլիսիում խորհրդարանի շենքի մոտ։
Հետևեք մեզ տելեգրամում
