Վրաստանի վարչապետ Իրակլի Կոբախիձեն ժամանել է Հայաստան: Այս մասին հայտնում է Վրաստանի կառավարությունը:
Հաղորդվել է, որ «Զվարթնոց» օդանավակայանում նրան դիմավորել է ՀՀ փոխվարչապետ Տիգրան Խաչատրյանը:
Այցի շրջանակում Իրակլի Կոբախիձեն հանդիպում կունենա ՀՀ վարչապետ Նիկոլ Փաշինյանի հետ: Երկու երկրների վարչապետերի նախագահությամբ կանցկացվի Հայաստան-Վրաստան տնտեսական համագործակցության միջկառավարական հանձնաժողովի նիստը: Հանձնաժողովի նիստի ավարտից հետո Իրակլի Կոբախիձեն և Նիկոլ Փաշինյանը մամուլի համար հանդես կգան համատեղ հայտարարություններով:
Նշենք, որ Վրաստանի վարչապետը Երևան է ժամանել պատվիրակության ուղեկցությամբ, որի կազմում են առաջին փոխվարչապետ, էկոնոմիկայի և կայուն զարգացման նախարար Լևան Դավիթաշվիլին, արտաքին գործերի նախարար Մակա Բոճորիշվիլին, տարածաշրջանային զարգացման և ենթակառուցվածքների նախարար Իրակլի Քարսելաձեն, շրջակա միջավայրի պաշտպանության և գյուղատնտեսության նախարար Դավիթ Սոնղուլաշվիլին, օկուպացված տարածքներից տեղահանվածների, աշխատանքի, առողջապահության և սոցիալական պաշտպանության նախարար Միխեիլ Սարջվելաձեն և կառավարության վարչակազմի ղեկավար Լևան Ժորժոլիանին:
Հետևեք մեզ տելեգրամում
