Թուրքական դատարանն արդարացրել է Դիարբեքիրի փաստաբանների միության նախկին ղեկավարներին՝ Հայոց ցեղասպանության տարելիցի կապակցությամբ 2021 թվականին արված հայտարարության համար։
Turkish Minute-ի փոխանցմամբ՝ այս գործը վերաբերում է Փաստաբանների միության նախկին նախագահ Նահիտ Էրենին, փոխնախագահ Մեհդի Օզդեմիրին և գործադիր խորհրդի ինը անդամներին, որոնք մեղադրվում են «Թուրք ազգին և պետությանը վիրավորելու» մեջ (Թուրքիայի Քրեական օրենսգրքի 301-րդ հոդված)՝ 2021 թվականի ապրիլի 24-ին Հայոց ցեղասպանության հիշատակի օրվա մասին հայտարարության հրապարակման համար։
Դիարբեքիրի 2-րդ բարձր քրեական դատարանում տեղի ունեցած նիստի ժամանակ, որին մասնակցել են Մարդու իրավունքների ասոցիացիայի (İHD), Թուրքիայի մարդու իրավունքների հիմնադրամի (TİHV), Իրավաբանների հանուն ազատության ասոցիացիայի (ÖHD) և Իրավապաշտպանների նախաձեռնության Դիարբեքիրի մասնաճյուղի ներկայացուցիչներ, մեղադրյալներն ազատվել են բոլոր մեղադրանքներից:
Այս որոշման շնորհիվ 2017-ից 2022 թվականներին 301-րդ հոդվածով նրանց դեմ հարուցված բոլոր վեց գործերն ավարտվել են արդարացումով։ Ելույթ ունենալով լսումների ժամանակ՝ ասոցիացիայի նախագահ Աբդուլքադիր Գյուլեչն ասել է, որ ասոցիացիան դեմ է բոլոր անարդարություններին և անօրինական գործողություններին՝ անկախ ինքնությունից։
Նա հայտարարել է, որ ապրիլի 24-ին «Մենք կիսում ենք մեծ աղետի ցավը» վերնագրով հայտարարությունը հրապարակել են պատմական ճշմարտությունը բացահայտելու համար և ընդգծել, որ դա հանցագործություն չէ Թուրքիայի ՔՕ 301-րդ հոդվածով։
Մեղադրական եզրակացության մեջ հայտարարությունը որպես ապացույց է նշվում՝ մատնանշելով հատվածներ, որոնք նկարագրում են 1915 թվականի ապրիլի 24-ը որպես «մութ օր» մի հասարակության համար, որը «դարեր շարունակ ապրել է միասին, սովորել է միմյանցից և ծաղկել բազմակարծության մեջ»:
«Ամեն ապրիլի 24-ին թուրքական կառավարությունն ու բյուրոկրատիան արձագանքում են տագնապալի լարվածությամբ՝ անտեսելով մեծ աղետի խավարը, որը կախված է մեր գլխին, միևնույն ժամանակ, հաշվելով, թե ով ինչպես է այն անվանում՝ պայքարելով ճշմարտության հետ»,- ասվում է հայտարարության մեջ։
Factor.am
Հետևեք մեզ տելեգրամում
