Նախորդ շաբաթ Իրանը վերսկսել է դեպի Հայաստան ապրանքների արտահանումը։ Այս մասին տեղեկացնում է իրանական «Mehr» լրատվական գործակալությունը։
Իրանի Իսլամական Հանրապետության մաքսային վարչության ներկայացուցիչ Ռուշոլլա Լաթիֆին հայտարարել է, որ արտահանումն իրականացվում է Իրանի հյուսիս-արևմտյան Նորդուզի (Մեղրի, Կարճևան) անցակետով:
Լաթիֆին ընդգծել է, որ նախորդ տարում (ըստ իրանական օրացույցի՝ այն ավարտվում է մարտի 19-ին) Հայաստանն Իրանից արտահանել 430 մլն դոլարի ապրանք։ Արտահանման նման ցուցանիշով Հայաստանը երկրորդն է Եվրասիական տնտեսական միության երկրների շարքում՝ Ռուսաստանից հետո:
Իրանի և Հայաստանի Առևտրաարդյունաբերության համատեղ պալատի ղեկավար Էրվիկ Յարիջանյանի խոսքով՝ Իրանի և ԵԱՏՄ-ի միջև Արտոնյալ առևտրի վերաբերյալ համաձայնագիրն էական նշանակություն է ունեցել Հայաստանի հետ առևտրաշրջանառության վրա: Նախորդ տարվա հոկտեմբերին այդ համաձայնագրի ուժի մեջ մտնելուց հետո երկու երկրների միջև առևտրի ծավալները զգալիորեն աճել են։ Նա նշել է, որ համաձայնության շրջանակներում երկու կողմն էլ կիրառում են սակագնային զեղչեր, և այդ առումով խնդիրներ չեն ծագել:
Իրանը Հայաստանից ներկրում է հիմնականում մթամթերք, իսկ Հայաստան է արտահանում պոլիմերային հումք, սարքավորումներ, արդյունաբերական գազ, արդյունաբերական արտադրանք, կաշի, կաշվե ապրանքներ:
Աղբյուրը նշում է, որ Իրանի և նրա հարևանների տնտեսական հարաբերությունների վրա ամերիկյան պատժամիջոցները գրեթե չեն ազդել: Իրանի Իսլամական Հանրապետության հյուսիսարևմտյան հարևանը՝ Հայաստանը, այն պետություններից մեկն է, որը, անկախ պատժամիջոցներից, պահպանել և զարգացնում է տնտեսական հարաբերություններն Իրանի հետ:
Հետևեք մեզ տելեգրամում
