«Ռուսաստանի նախագահ Վլադիմիր Պուտինը մտադիր չէ իր թուրք պաշտոնակից Ռեջեփ Թայիփ Էրդողանի հետ քննարկել Թուրքիայում վերջին օրերին ծավալվող ներքաղաքական իրադարձությունները», – այսօր լրագրողների հետ զրույցում հայտարարել է Կրեմլի պաշտոնական ներկայացուցիչ Դմիտրի Պեսկովը։
«Թուրքիայում ծավալվող բողոքի գործողություններն այդ երկրի ինքնիշխան գործն են և չեն կարող բարձր մակարդակում շփումների առիթ լինել», – նշել է Պեսկովը։
Նա նաև ասել է, որ այս շաբաթ Պուտինի և Էրդողանի միջև հեռախոսազրույց նախատեսված չէ։ Հավանական հեռախոսազրույցի մասին ավելի վաղ հայտարարել էր թուրքական Hurriyet օրաթերթը։
Մարտի 19-ին Ստամբուլում ձերբակալվել է Էրդողանի գլխավոր քաղաքական հակառակորդ, Ստամբուլի քաղաքապետ Էքրեմ Իմամօղլուն՝ փողերի լվացման, անօրինական եկամուտ ստանալու և ֆինանսական միջոցների ստվերային հոսքին առնչություն ունենալու կասկածանքով։
Թուրքական լրատվամիջոցների փոխանցմամբ, այս գործով ձերբակալվածների ընդհանուր թիվը հասնում է հարյուրի։
Իմամօղլու ձերբակալության դեմ Թուրքիայում բողոքի ակցիաներ են մեկնարկել։
Հետևեք մեզ տելեգրամում
