Թուրքիայի նախագահի աշխատակազմի հանրային կապերի վարչության ապատեղեկատվության դեմ պայքարի կենտրոնը հերքել է հայ–թուրքական սահմանի բացման մասին որոշ լրատվամիջոցների հրապարակումները։
«Որոշ լրատվամիջոցներում տեղ գտած «Թուրքիայի անսպասելի քայլը. սահմանը բացվեց հայերի համար, Բաքուն անտեղյակ մնաց» պնդումը չի համապատասխանում իրականությանը։ Ալիջան (Մարգարա) սահմանային անցակետը բացվել է միայն Հայաստանից Սիրիա մեր երկրի տարածքով մարդասիրական օգնության շարասյունի անցումն ու վերադարձն ապահովելու նպատակով։ 1992 թվականին ընդունված նախարարների խորհրդի որոշմամբ Ալիջան սահմանային անցակետին տրվել է Ժամանակավոր սահմանային անցակետի կարգավիճակ՝ միայն մարդասիրական օգնության տեղափոխման համար։
Հայաստանի 4 բեռնատարներից բաղկացած մարդասիրական օգնության շարասյունը երեկ Իգդիր նահանգի Ալիջան սահմանային անցակետով մուտք է գործել մեր երկիր՝ Հաթայի/Ջիլվեգյոզու սահմանային անցակետով Սիրիա մարդասիրական օգնություն հասցնելու նպատակով։ Նախատեսվում է, որ բեռնատարները վաղը կեսօրին կհասնեն Սիրիա։ Այդ բեռնատարները նույն երթուղով կվերադառնան Հայաստան»։
Նշվել է, որ Ալիջան սահմանային անցակետը վերջին անգամ օգտագործվել է 2023թ. փետրվարի 6-ի երկրաշարժից հետո, երբ Հայաստանն ուղարկել է հումանիտար օգնություն:
Ըստ հրապարակման՝ Ալիջան սահմանային անցակետն օգտագործվել է կարգավորման գործընթացի հատուկ ներկայացուցիչների կողմից 2024թ. հուլիսի 30-ին սահմանին կայացած հինգերորդ փուլի բանակցությունների շրջանակներում փոխադարձ անցումների համար։
Նշվել է նաև, որ այս անցակետն օգտագործվում է նաև Թուրքիա-Հայաստան սահմանային հանձնաժողովների կողմից սահմանային հարցերի վերաբերյալ իրենց հանդիպումների շրջանակներում»։Նշվել է
Հետևեք մեզ տելեգրամում
