ՀՀ ճանապարհային ոստիկանության կարգախմբերը կորոնավիրուսային վարակի տարածման կանխարգելման շրջանակներում իրականացրել են մի շարք միջոցառումներ։ Այս մասին մամուլի ասուլիսի ժամանակ հայտնել է ՀՀ փոխոստիկանապետ Հայկ Մհրյանը։
«Իրանի Իսլամական Հանրապետությունից ՀՀ մուտք գործած բեռնափոխադրում իրականացնող տրանսպորտային միջոցների քանակը արտակարգ դրության օրերին եղել է 1․271, որն իրականացվել է 1․197 կարգախմբի կողմից։ Ճանապարհային ոստիկանության կարգախմբերի կողմից համավարակի կանխարգելման շրջանակներում ՀՀ տարածքում իրականացվել է 106 տրանսպորտային միջոցի ուղեկցում»,- նշեց Մհրյանը։
Նրա խոսքով՝ «Զվարթնոց» օդանավակայանում սահմանափակվել է տրանսպորտային միջոցների տեղաշարժը և իրականացվել են ուղեկցումներ դեպի Վրաստանի Հանրապետություն և մեկուսացման վայրեր։ 8 անգամ սահմանափակվել է տրանսպորտային միջոցների տեղաշարժը 16 կարգախմբի միջոցով։ Դեպի Արցախի Հանրապետություն թույլատրվել է 2․946, արգելվել՝ 603 տրանսպորտային միջոցի մեկնումը։
Նշենք, որ Հայաստանի կառավարությունն ապրիլի 14-ին կայացած արտահերթ նիստում ընդունեց hանրապետությունում 2020 թվականի մարտի 16-ին հայտարարված արտակարգ դրության ժամկետը 2020 թվականի ապրիլի 14-ից ժամը 17:00-ից` 30 օրով՝ մինչև 2020 թվականի մայիսի 14-ը ժամը 17:00-ն երկարաձգելու որոշում։ Երկրում գործում է խիստ սահմանափակումների ռեժիմ:
Հետևեք մեզ տելեգրամում
