Վրաստանի արտգործնախարար Մակա Բոճորիշվիլին արձագանքել է ՌԴ ԱԳ փոխնախարար Միխայիլ Գալուզինի՝ Վրաստանի հետ հարաբերությունները վերականգնելու մասին հայտարարությանը՝ նշելով, որ օկուպացիայի պայմաններում անհնար է խոսել դիվանագիտական հարաբերությունների վերականգնման մասին:
«Անհնար է խոսել դիվանագիտական հարաբերությունների վերականգնման կամ հարաբերությունների կարգավորման մասին օկուպացիայի պայմաններում»,-ասել է Բոճորիշվիլին։
«Բոլորը շատ լավ գիտեն, թե ինչ խնդիր կա Վրաստանի և Ռուսաստանի միջև, և ինչի են բախվում Վրաստանի և Ռուսաստանի միջև դիվանագիտական հարաբերությունները։ Սա մեր տարածքների օկուպացիան է, և սա Ռուսաստանի հետ հարաբերությունների կարգավորման թիվ մեկ խոչընդոտն է»,-նշել է Վրաստանի ԱԳՆ ղեկավարը:
Նշենք, որ «Իզվեստիա» թերթին տված հարցազրույցում ՌԴ արտաքին գործերի փոխնախարարը խոսել էր Վրաստանի հետ հարաբերությունների մասին՝ հայտարարելով, որ Մոսկվան պատրաստ է վերականգնել դիվանագիտական հարաբերությունները Թբիլիսիի հետ:
Հետևեք մեզ տելեգրամում
