ՀՀ ԱԳ նախարար Արարատ Միրզոյանը Սլովենիայի արտաքին գործերի նախարար Տանյա Ֆայոնի հետ համատեղ ասուլիսի ժամանակ այս մասին հայտարարել է, որ Ադրբեջանի ու Թուրքիայի ԱԳ ղեկավարների հետ շփումները դրական են։
«Չենք կարող ասել, որ Անթալիայում մեր ունեցած, ինչպես Ադրբեջանի, այնպես էլ Թուրքիայի արտգործնախարարների հետ շփումների, մեր ունեցած խոսակցությունների արդյունքում ունենք վերջնական լուծումներ և պայմանավորվածություններ։ Բայց չենք կարող նաև ժխտել, որ մշտապես հանդիպումները, քննարկումները, խոսակցությունները, այնուամենայնիվ, կողմերին առնվազն ավելի հասկանալի են դարձնում միմյանց համար։ Առնվազն ամեն հանդիպումից հանդիպում թեմաներ, ենթաթեմաներ կամ նոր ենթաշերտեր են հնարավոր լինում քննարկել, որը, անշուշտ, արդյունավետ է ընդհանուր գործընթացի տեսանկյունից։ Այնպես, որ ես դրական եմ համարում մեր շփումները»,-ասել է ՀՀ ԱԳՆ ղեկավարը։
Միրզոյանի խոսքով, Ադրբեջանի ԱԳՆ ղեկավար Ջեյհուն Բայրամովի հետ պետք է շարունակել խոսակցությունը։
«Ինչպես և նախկինում, մենք կարծում ենք, որ դե ֆակտո ավարտված հակամարտությունը դե յուրե ավարտվելու դեպքում, ինստիտուցիոնալ կերպով կոնֆլիկտի ավարտն ազդարարելու դեպքում, ինչպիսին է՝ որի մարմնավորումը կարող է լինել խաղաղության համաձայնագրի ստորագրումը, այդ դեպքում կարիք չենք ունենա մի միջազգային կազմակերպության ֆորմատի, որը կոչված է զբաղվել այդ հակամարտությամբ, օրինակ։ Հետևաբար, Մինսկի խմբի գոյությունը իսկապես ոչ մի հավելյալ արժեք չի տալիս, և նույնիսկ հակառակը, կարող է ազդեցություն ունենալ կարգավորված հակամարտության պարագայում»,-նշել է Միրզոյանը։
Հետևեք մեզ տելեգրամում
