Թուրքիայի նախագահ Ռեջեփ Թայիփ Էրդողանը «Բաքվի էներգետիկ շաբաթվա» խորագրով ծրագրի բացմանն ուղերձ է հղել, որը ընթերցել է Թուրքիայի էներգետիկայի և բնական ռեսուրսների նախարար Ալփասլան Բայրաքթարը։
Շեշտելով, որ Թուրքիան և Ադրբեջանն էներգետիկ ոլորտում բազմաթիվ հաջողություններ են գրանցել՝ Էրդողանն իր ուղերձում նշել է․
«Վերջին տարիներին տեղի ունեցած համաշխարհային աշխարհաքաղաքական զարգացումները ևս մեկ անգամ ընդգծել են, թե էներգետիկ անվտանգության համատեքստում որքան կարևոր է Թուրքիա-Ադրբեջան համագործակցությունը։ Մեր այս համագործակցությունը, որ պսակել ենք այնպիսի ենթակառուցվածքային ներդրումներով, ինչպիսիք են Բաքու-Թբիլիսի-Ջեյհան, Բաքու-Թբիլիսի-Էրզրում խողովակաշարերը, շարունակում են կարևոր նպաստներ բերել ոչ միայն Թուրքիային և Ադրբեջանին, այլև տարածաշրջանի և Եվրոպայի էներգետիկ անվտանգությանը։ Իգդիր-Նախիջևան խողովակաշարի գործարկումն ամրապնդել է Նախիջևանի շրջանի էներգետիկ անվտանգությունը և մեզ միասին ավելի ուժեղ է դարձրել։ Թուրքիայի և Ադրբեջանի միջև էլեկտրաէներգիայի կապի ընդլայնումը մեզ համար ռազմավարական նշանակության ևս մեկ նախագիծ է»։
Նշելով Թուրքիա-Նախիջևան և Թուրքիա-Վրաստան էլեկտրաէներգիայի կապի կարևորության մասին՝ Էրդողանն ասել է, որ Թուրքիայի, Ադրբեջանի, Վրաստանի և Բուլղարիայի միջև նոր գիծ հիմնելու նպատակով «Կանաչ էլեկտրաէներգիայի հաղորդման և առևտրին ուղղված համագործակցության մասին հուշագիր» են ստորագրել։
Հետևեք մեզ տելեգրամում
