Թուրքիայի արտաքին գործերի նախարարությունը կոշտ է արձագանքել Իսրայելի կողմից «Madleen» նավի նկատմամբ իրականացված միջամտությանը։
ԱԳՆ հայտարարության մեջ նշվել է. «Միջազգային ջրերում իրականացված միջամտությունը միջազգային իրավունքի բացահայտ խախտում է»։
Հայտարարության համաձայն՝ «Գազային մարդասիրական օգնություն հասցնելու նպատակով ուղևորվող և իր կազմում նաև Թուրքիայի քաղաքացիներ ունեցող «Madleen» նավի նկատմամբ Իսրայելի ուժերի միջամտությունը միջազգային ջրերում՝ միջազգային իրավունքի ակնհայտ խախտում է։
«Նավարկության ազատությունն ու ծովային անվտանգությունը սպառնալիքի տակ դնող Նեթանյահուի կառավարության այս դատապարտելի գործողությունը ևս մեկ անգամ ապացուցում է, որ Իսրայելը ահաբեկչական պետություն է։ Գազայում սովն իբրև զենք օգտագործող և մարդասիրական օգնության առաքումը կանխող Իսրայելի ցեղասպան քաղաքականության դեմ միջազգային հանրության արդարացի արձագանքը շարունակվելու է։ Իսրայելի ագրեսիվ և իրավունքը չճանաչող պահվածքը չի կարող լռեցնել մարդկային արժեքները պաշտպանող ձայները»,-նշվել է հայտարարությունում։
Հիշեցնենք, որ Իսրայելի ռազմածովային հրամանատարությունը վերահսկողություն է հաստատել Գազայի ափ ուղևորվող «Madleen» նավի նկատմամբ, որի տախտակամածին գտնվող 12 ակտիվիստների շարքում էր նաև շվեդ էկոակտիվիստ Գրետա Թունբերգը: Իսրայելի արտգործնախարարությունը հայտնել է, որ «Madleen»-ը վերաուղղորդվել է դեպի Իսրայելի ափեր, և ակնկալվում է, որ նրա ուղևորները կվերադառնան իրենց երկրներ: Իսրայելի վարչապետ Բենիամին Նեթանյահուի գրասենյակի խորհրդական Դմիտրի Գենդելմանն էլ X-ում գրել է, որ նավը կալանելու գործողությունն իրականացվել է միջազգային իրավունքի լիակատար պահպանմամբ։
Ermenihaber.am
Հետևեք մեզ տելեգրամում
