Թեհրանի միջուկային մշակումների վերաբերյալ ԱՄՆ-Իրան բանակցությունների հաջորդ փուլը տեղի կունենա հունիսի 13-ին Օսլոյում կամ հունիսի 15-ին Մասկատում: Այս տեղեկատվությունը երկուշաբթի օրը X-ում հաղորդել է Axios-ի թղթակից Բարաք Ռավիդը։
«ԱՄՆ պաշտոնյան ինձ ասաց, որ ԱՄՆ-Իրան միջուկային բանակցությունների վեցերորդ փուլը տեղի կունենա կամ ուրբաթ օրը Օսլոյում, կամ կիրակի օրը Մասկատում»,-գրել է Ռավիդը՝ նշելով, որ պաշտոնյան այս հարցի վերաբերյալ որևէ այլ տեղեկատվություն չի տրամադրել։
Մինչդեռ, ԱՄՆ նախագահ Դոնալդ Թրամփն ավելի վաղ հայտարարել էր, որ Իրանի հետ բանակցությունների նոր փուլը տեղի կունենա հինգշաբթի՝ հունիսի 12-ին։ Նրա խոսքով՝ Վաշինգտոնը պնդում է, որ Թեհրանը հրաժարվի իր տարածքում ուրանի հարստացումից։ Սակայն, Սպիտակ տան ղեկավարը ընդգծել է, որ Իրանի իշխանությունները համաձայն չեն դրա հետ։
Հիշեցնենք, որ Իրանի և Միացյալ Նահանգների ներկայացուցիչները մայիսի 23-ին Հռոմում անցկացրեցին բանակցությունների հինգերորդ փուլը՝ Իրանի միջուկային ծրագրի շուրջ տարաձայնությունները լուծելու համար։
Հետևեք մեզ տելեգրամում
