Մոսադը անօդաչու թռչող սարքերի բազա է ստեղծել Իրանում

Իսրայելը տարիներ է ծախսել Իրանի միջուկային և հրթիռային ծրագրերի դեմ գործողության նախապատրաստման համար, այդ թվում՝ Իրանի տարածքում անօդաչու թռչող սարքերի բազա կառուցելով և երկիր մաքսանենգ ճանապարհով ճշգրիտ զենքի համակարգեր և հատուկ նշանակության ջոկատներ ներմուծելով։ Այս մասին The Times of Israel-ին ասել է անվտանգության պաշտոնյան։

Պաշտոնյայի փոխանցմամբ, Մոսադը (Իսրայելի հետախուզական ծառայությունը) անօդաչու թռչող սարքերի բազա է տեղադրել Իրանում։ Անօդաչու թռչող սարքերը գործի են դրվել գիշերը՝ հարվածելով Իսրայելին ուղղված «երկիր-երկիր» դասի հրթիռային կայանքներին։

Բացի այդ, զենքի համակարգեր տեղափոխող մեքենաները մաքսանենգ ճանապարհով ներմուծվել են Իրան։

Այս համակարգերը ոչնչացրել են Իրանի օդային պաշտպանությունը և իսրայելական ինքնաթիռներին տվել օդային գերակայություն և գործողությունների ազատություն Իրանի նկատմամբ։

Երրորդ գաղտնի ջանքը՝ Մոսադի հրամանատարների կողմից բարձր ճշգրտության հրթիռների տեղակայումն էր Իրանի կենտրոնական մասում գտնվող հակաօդային կայանքների մոտ։

Գաղտնի գործողությունը, ըստ պաշտոնյայի, Մոսադի կողմից ծրագրվել էր երկար ժամանակ և պահանջում էր պլանավորում՝ «ինչպես նաև նորարարական մտածողություն և հնարքներ»։