Իսրայելը համաձայնել է Գազայի հատվածում 60-օրյա հրադադարի, ասել է Դոնալդ Թրամփը։ «Հուսով եմ, որ Մերձավոր Արևելքի բարօրության համար Համասը կընդունի այս գործարքը, քանի որ շարունակվելու դեպքում իրավիճակը չի լավանալու՝ ավելի է վատանալու»,-«Դոյչե վելե»-ի փոխանցմամբ այդ մասին ԱՄՆ նախագահը գրել է Truth Social սոցիալական ցանցում։
Նրա խոսքով՝ իր վարչակազմի ներկայացուցիչները հուլիսի 1-ին արդյունավետ հանդիպում են ունեցել իսրայելական պատվիրակության հետ՝ Գազայի հատվածի հարցի շուրջ և համաձայնեցրել 60-օրյա հրադադարի կնքման պայմանները։ Իսրայելը դեռևս չի մեկնաբանել Թրամփի հայտարարությունը։
Հաջորդ շաբաթ Սպիտակ տան ղեկավարը Վաշինգտոնում կընդունի Իսրայելի վարչապետ Բենիամին Նեթանյահուին։ Գազայի հատվածում հրադադարի համաձայնագիրը, ինչպես Թրամփը հույս ունի, նույնպես կկնքվի հաջորդ շաբաթ։
Գազայի առողջապահության նախարարության տվյալներով՝ 2023 թվականի հոկտեմբերի 7-ից ի վեր պատերազմում զոհվել է ավելի քան 55,000 պաղեստինցի, որի կեսից ավելին երեխաներ ու կանայք են։ Գազայի հատվածում հումանիտար իրավիճակը բնութագրվում է աղետալի։
Հետևեք մեզ տելեգրամում
