Թուրքիայի ասորի պատգամավոր. Արդյո՞ք ճիշտ է, որ Անիի Մայր տաճարը վերանորոգումից հետո բացվելու է որպես մզկիթ

Թուրքիայի քրդամետ «Ժողովուրդների հավասարություն և ժողովրդավարություն» կուսակցության՝ Մարդինից ընտրված ասորի պատգամավոր Ջորջ Արսլանը հարցապնդում է ներկայացրել մշակույթի և տուրիզմի նախարար Նուրի Էրսոյին Անիի Մայր Տաճարը որպես մզկիթ այցելուների համար բացելու հարցի առնչությամբ։

Ասլանը նշել է, որ Անիի Մայր տաճարի նման Թուրքիայում հարյուրավոր պատմական եկեղեցի և վանք վերանալու վտանգի առջև է: Ըստ նրա՝ դրանց մի մասն էլ մզկիթների է վերածվել։ Նա ուշադրություն է հրավիրել տաճարի կարևորությանը համաշխարհային մշակութային ժառանգության տեսանկյունից։

Պատգամավորը հարցրել է․

1․Արդյո՞ք ճիշտ են պնդումները, որ Անիի Մայր տաճարը վերանորոգումից հետո բացվելու է որպես մզկիթ։
2․Արդյոք Թուրքիայի բազմակրոն և բազմամշակույթ էությանը հակասող կանոնակարգում չէ նշյալ պատմական կառույցի կրոնական ինքնության փոփոխության ու մզկիթի վերածման որոշումը։
3․Անիի Մայր տաճարը մզկիթ վերածելու որոշումը, հաշվի առնելով կառույցի կրոնական և հատուկ ինքնությունը, վերանայվելու՞ է։
4․Ձեր նախարար լինելու ժամանակաշրջանում մզկիթի վերածված եկեղեցիներն ու վանքերը որո՞նք են։ Վերջին 20 տարում որքա՞ն է մզկիթի վերածված եկեղեցիների և վանքերի թիվը։

Հիշեցնենք, որ Թուրքիայի «Anadolu» պետական լրատվական գործակալությունը ավելի վաղ հայտնել էր, որ վերանորոգումից հետո Անիի Մայր տաճարը գործելու է որպես մզկիթ։