Ռուս-ուկրաինական հակամարտության շուրջ տարաձայնությունները չպետք է խաթարեն Ռուսաստանի և Ադրբեջանի փոխշահավետ հարաբերությունները: «Արմենպրես»-ի փոխանցմամբ՝ այս մասին հայտնել է Ռուսաստանի նախագահի մամուլի քարտուղար Դմիտրի Պեսկովը ճեպազրույցի ժամանակ:
«Մեզ հայտնի է Ուկրաինայի վերաբերյալ Ադրբեջանի ղեկավարության դիրքորոշումը: Այստեղ մենք տարբեր կարծիքներ ունենք։ Հենց ամենասկզբից նախագահ Իլհամ Ալիևն այդ դիրքորոշումն է զբաղեցրել: Հենց ամենասկզբից մենք համաձայն չենք եղել դրա հետ», – Պեսկովի խոսքերն է մեջբերում ՏԱՍՍ գործակալությունը:
«Միաժամանակ հույս ունենք, որ այդ տարաձայնությունները չեն խոչընդոտի, որ մենք հաղթահարենք երկկողմ հարաբերություններում, հուսանք, կարճատև սառնությունը», – հավելել է Պեսկովը։
Կրեմլի խոսնակը նաև հույս է հայտնել, որ երկու երկրները ստեղծված իրավիճակի պատճառով չեն զոհաբերի փոխշահավետ հարաբերությունները։
Ադրբեջանի նախագահ Իլհամ Ալիևն օրերս հայտարարել է, որ Ուկրաինան չպետք է համաձայնի «կորցրած տարածքների օկուպացիային»: Նա նման հայտարարություն է արել Մոսկվայի հետ հարաբերությունների լարվածության ֆոնին։
Հետևեք մեզ տելեգրամում
