Հայաստանը պատրաստվում է երկու հայտ ներկայացնել ՅՈՒՆԵՍԿՕ՝ Համաշխարհային ժառանգության նախնական ցանկում ընդգրկվելու համար։
ՀՀ կրթության, գիտության, մշակույթի և սպորտի նախարարությունում տեղի է ունեցել ՅՈՒՆԵՍԿՕ-ի համաշխարհային ժառանգության 1972 թ. կոնվենցիայի շրջանակում կատարվող աշխատանքների և ընթացիկ հարցերի քննարկման նպատակով ձևավորված աշխատանքային խմբի հանդիպումը։
Նախարարության պատմության և մշակույթի հուշարձանների պահպանության վարչության պետ, ՅՈՒՆԵՍԿՕ-ի համաշխարհային ժառանգության 1972 թ․ կոնվենցիայի ազգային համակարգող Հարություն Վանյանը ներկայացրել է Համաշխարհային ժառանգության նախնական ցանկում վերջին 2 տարիներին ընդգրկված 3 հուշարձանները՝ «Տիրինկատարի վիշապաքարերը և մշակութային լանդշաֆտը», «Երևանի ուրարտական ժառանգությունը», «Գառնի հնագիտական համալիրը և Քարերի սիմֆոնիան»։
Հարություն Վանյանը տեղեկացրել է նաև, որ Հայաստանը պատրաստվում է 2 նոր հայտ ներկայացնել, որոնցից մեկը վերաբերում է «Արենի-1» քարայրին և գինեգործության հետ վերջինիս կապին, իսկ երկրորդի մասին կհայտարարվի առաջիկայում։
Հանդիպման ընթացքում նախանշվել են Համաշխարհային ժառանգության ցանկում նոր հուշարձաններ ընդգրկելու ուղղությամբ հետագա անելիքները։ Մասնավորապես՝ քննարկվել են նախնական ցանկում ընդգրկված հուշարձանները հիմնական ցանկ տեղափոխելու անհրաժեշտությունը, ինչպես նաև նախնական ցանկում ընդգրկվելու չափանիշներին համապատասխանող մի շարք հուշարձանների առաջադրման հավանականությունը։ Ցանկում որպես առանձին բաղադրիչ ներառելու նպատակով քննարկվել է նաև բնության հուշարձան առաջադրելու հնարավորությունը:
Նշենք, որ ՅՈՒՆԵՍԿՕ-ի Համաշխարհային ժառանգության հիմնական ցանկում արդեն ընդգրկված են Հայաստանի մի շարք պատմամշակութային արժեքներ, այդ թվում՝ Հաղպատի ու Սանահինի վանքերը, Գեղարդավանքը, ինչպես նաև Էջմիածնի մայր տաճարը։
Հետևեք մեզ տելեգրամում
