Հայաստանի Ազգային ժողովի նախագահ Ալեն Սիմոնյանի գլխավորած պատվիրակությունը պաշտոնական այցով մեկնել է Ղրղզստան և հանդիպել Ղրղզական Հանրապետության խորհրդարանի (Ժոգորկու Քենեշ) նախագահ Նուրլանբեկ Տուրգունբեկ ուուլուի հետ։
Ալեն Սիմոնյանը շնորհակալություն է հայտնել ղրղզ գործընկերոջը ջերմ ընդունելության համար՝ ընդգծելով, որ հաճելի է լինել բարեկամ երկրում։ Զրույցի ընթացքում կողմերը քննարկել են միջխորհրդարանական հարաբերությունների զարգացմանը և երկկողմ հետաքրքրություն ունեցող հարցերին առնչվող թեմաներ։
Կողմերը նաև անդրադարձել են Հայաստանի և Ադրբեջանի միջև խաղաղության հաստատման գործընթացին։ Նուրլանբեկ Տուրգունբեկ ուուլուն նշել է, որ Ղրղզստանը ողջունում է Վաշինգտոնում ընդունված հռչակագիրը և նախաստորագրված խաղաղության համաձայնագիրը՝ ընդգծելով դրանց կարևորությունը տարածաշրջանում կայուն խաղաղության հաստատման համար։
Իր հերթին Սիմոնյանը գործընկերոջ ուշադրությունը հրավիրել է Ադրբեջանում պահվող գերիների և անհետ կորած զինծառայողների խնդրին՝ կարևորելով դրանց արագ լուծման անհրաժեշտությունը։
Հետևեք մեզ տելեգրամում
