Լեռնային Ղարաբաղից բռնի տեղահանված ավելի քան 16 հազար անձ ստացել է Հայաստանի Հանրապետության քաղաքացիություն:
«Արմենպրես»-ի փոխանցմամբ՝ ԱԺ պաշտպանության և անվտանգության հարցերի հանձնաժողովի նիստում այս մասին հայտնեց Ներքին գործերի փոխնախարար Արմեն Ղազարյանը:
«Սեպտեմբերի 2-ի դրությամբ ունենք 16 հազարից ավելի դիմում, ունենք 11 հազար 259 անձ, որոնք նախագահի հրամանագրով ստացել են ՀՀ քաղաքացիություն և 5000–ից ավելի անչափահաս, որոնք, երբ ծնողները ձեռք են բերում քաղաքացիություն, անձնագրի փոփոխությամբ ձեռք են բերել քաղաքացիություն: Դա նշանակում է, որ ԼՂ մեր հայրենակիցներից արդեն 16 հազարից ավելին ձեռք են բերել ՀՀ քաղաքացիություն»,-ասաց Ղազարյանը:
Նրա խոսքով՝ գործընթացը դյուրացնելու և գործընթացներն ակտիվացնելու ուղղությամբ քայլեր են իրականացվում: Քաղաքացիության գործերը վարվում էին կենտրոնացված համակարգի միջոցով: «Հիմա մարզերում մեր բոլոր ստորաբաժանումներն արդեն ԼՂ-ից բռնի տեղահանված անձանցից ընդունում են քաղաքացիության դիմումներ: Երևանում ունեինք 1 կետ, ավելացրել ենք ևս 1 կետ»,–ասաց փոխնախարարը:
Նա նշեց՝ աշխատում են, որ Երևանի տարածքային բոլոր ստորաբաժանումները ևս ընդունեն դիմումներ: Փոխնախարարը հիշեցրեց նաև շրջիկ ծառայության մասին:
«ԼՂ-ից տեղահանված անձինք մեր ստանդարտ ընթացակարգերի համեմատ առնվազն կիսով չափ ավելի արագ ժամանակահատվածում են ձեռք բերում քաղաքացիություն: Մեր ստանդարտ ընթացակարգերը ենթադրում են 90 աշխատանքային օր՝ մոտ 4 ամիս, ԼՂ-ից տեղահանված անձանց առնվազն 2 ամսվա ընթացքում կարողանում ենք տրամադրել»,-նշեց նա:
Հետևեք մեզ տելեգրամում
