Վրաստանում խստացնում են հավաքների և ցույցերի անցկացման կանոնակարգը

Վրաստանի խորհրդարանն առաջին ընթերցմամբ ընդունել է հավաքների և ցույցերի կանոնակարգը խստացնող օրենսդրական փաթեթ։ Քրեական օրենսգրքում և Վարչական իրավախախտումների վերաբերյալ օրենսգրքում նախատեսված փոփոխությունները քննարկվում են արագացված կարգով։ Նախատեսվում է փաթեթը քննարկել և ընդունել երկրորդ և երրորդ ընթերցումներով հոկտեմբերի 16-ի լիագումար նիստում։

Ըստ փոփոխությունների՝ հավաքի կամ ցույցի ժամանակ մասնակցի կողմից դեմքը դիմակով ծածկելու, արցունքաբեր գազի և/կամ թունավոր նյութերի առկայության դեպքում, ճանապարհ փակելու կամ ժամանակավոր կառույց կառուցելու դեպքում առաջին անգամ անձը կպատժվի վարչական կալանքով՝ մինչև 15 օր, իսկ եթե խախտողը կազմակերպիչ է, ապա՝ մինչև 20 օր վարչական կալանքով։ ՆԳՆ-ի պահանջով հավաքը դադարեցնելու մասին իմանալուց հետո ցույցին կամ հավաքին մասնակցությունը կպատժվի 60 օր կալանքով։ Մինչև 60 օր վարչական կալանք կկիրառվի նաև յուրաքանչյուրի նկատմամբ, ով հավաքի ժամանակ կունենա զենք, պիրոտեխնիկա կամ առարկաներ, որոնք կարող են վնաս հասցնել ուրիշների կյանքին և առողջությանը։

Այս արգելված գործողությունների կրկնակի խախտումները կհանգեցնեն մինչև մեկ տարի քրեական պատասխանատվության, իսկ երրորդ և յուրաքանչյուր հաջորդ նմանատիպ հանցագործության դեպքում՝ մինչև երկու տարի քրեական պատասխանատվության։ ՔՕ է ներմուծվում նաև նոր հոդված, որը քրեական պատասխանատվություն է սահմանում իրավապահ մարմինների աշխատակցին երրորդ անգամ վիրավորելու կամ օրինական կարգադրությունը չկատարելու համար։