Վրաստանի ընդդիմադիր «Գախարիան Վրաստանի համար» կուսակցության ղեկավարներից Գիորգի Շարաշիձեն հայտարարել է, որ կուսակցությունը դադարեցնում է բոյկոտը և վերադառնում է Վրաստանի 11-րդ գումարման խորհրդարան։
Նա ընդգծել է, որ քաղաքական իրավիճակը երկրում պահանջում է ընդդիմության ակտիվ ներգրավվածություն։
«Մեկ տարի առաջ՝ հոկտեմբերի 26-ի խորհրդարանական ընտրություններից հետո, մեր քաղաքական թիմը միաձայն որոշեց բոյկոտել խորհրդարանը։ Ցավոք, պետք է խոստովանենք, որ քաղաքական բողոքի այս ձևը չկարողացավ կանգնեցնել չարագործ «Երազանքի» մեքենան և չկարողացավ կանխել երկրի համար վնասակար որոշումները»,- հայտարարել է Շարաշիձեն։
Նրա խոսքով՝ ժամանակն է «պատասխանել ստին ճշմարտությամբ, իսկ արհամարհանքի և ատելության լեզվին՝ իմաստությամբ»։
«Մենք սկսում ենք ժողովրդի համար նախատեսված բոլոր քաղաքական գործիքներն ու հարթակները վերադարձնել ժողովրդի ծառայությանը, քանի որ Վրաստանի ներկայացուցչական մարմինները՝ մունիցիպալ խորհուրդները և ազգային մակարդակով խորհրդարանը, չեն պատկանում «Երազանքին», այլ պատկանում են միայն վրաց ժողովրդին»,-ասել է կուսակցության ղեկավարը:
Հետևեք մեզ տելեգրամում
