ՀՀ վարչապետ Նիկոլ Փաշինյանը Թբիլիսիում ընթացող «Մետաքսի ճանապարհ» 5-րդ համաժողովում իր ելույթում արձագանքել է Իլհամ Ալիևի հայտարարությանը, ըստ որի՝ վերացվում են Ադրբեջանի տարածքով դեպի Հայաստան բեռների տարանցման սահմանափակումները։
«Իլհամ Ալիևը երեկ հայտարարեց, որ Ադրբեջանը վերացնում է իր տարածքով դեպի Հայաստան բեռների տարանցման սահմանափակումները։ Սա չափազանց կարևոր հայտարարություն է, և ուզում եմ իմ գնահատանքն արտահայտել Ադրբեջանի նախագահի այս քայլի առիթով և ողջունել այդ հայտարարությունը»,– նշել է Փաշինյանը։
Վարչապետը նաև շնորհակալություն է հայտնել Ղազախստանի նախագահ Կասիմ-Ժոմարտ Տոկաևին և Վրաստանի վարչապետ Իրակլի Կոբխիձեին՝ ընդգծելով.
«Տեղի է ունենում ամիսներ առաջ անհավանական թվացող մի բան. Ղազախստանից Ադրբեջանով և Վրաստանով Հայաստան է ներմուծվում հացահատիկ։ Այս գործարքի համար ուզում եմ գնահատանքիս խոսքերը ուղղել նաև Ղազախստանի նախագահին և Վրաստանի վարչապետին»։
Փաշինյանը հավելել է, որ Հայաստանը պատրաստ է հենց այսօրվանից իր տարածքով ապահովել բեռնատար ավտոմեքենաների տարանցումը Թուրքիայից դեպի Ադրբեջան և Ադրբեջանից դեպի Թուրքիա։
Հետևեք մեզ տելեգրամում
