Թուրքիայի նախագահ Ռեջեփ Թայիփ Էրդողանը հայտարարել է, որ Անկարան քուրդ քաղաքական գործիչ Սելահաթին Դեմիրթաշի հնարավոր ազատ արձակման վերաբերյալ որոշումը կկայացնի` ելնելով տեղական դատական իշխանությունների որոշման վրա։
Էրդողանը նման կերպ է մեկնաբանել Մարդու իրավունքների եվրոպական դատարանի (ՄԻԵԴ) վճիռը, որը երկուշաբթի օրը մերժեց Թուրքիայի բողոքարկումը Դեմիրթաշի գործով նախկինում կայացված որոշումը վերանայելու վերաբերյալ։
«Մենք իրավական պետություն ենք։ Մենք կհետևենք տեղական դատարանի որոշմանը»,-Էրդողանի խոսքերն է մեջբերել NTV-ն։
Թուրքիայի արդարադատության նախարար Յըլմազ Թունչը չորեքշաբթի օրը ավելի վաղ հայտարարել էր, որ Դեմիրթաշի գործով որոշումը կկայացնի Անկարայի շրջանային դատարանը, որտեղ նրա փաստաբանները բողոքարկել էին Ստրասբուրգի դատարանի վճիռը։
«Մենք պետք է սպասենք Անկարայի դատարանի որոշմանը»,-լրագրողներին ասել է նա։
Հոկտեմբերին Թուրքիան միջնորդություն ներկայացրեց ՄԻԵԴ-ի Մեծ պալատ՝ վերանայելու քրդամետ Ժողովուրդների դեմոկրատական կուսակցության նախկին համանախագահ Դեմիրթաշի գործով որոշումը։ Նա ձերբակալվել էր 2016 թվականին ահաբեկչության հետաքննության շրջանակներում և հետագայում դատապարտվել 42 տարվա ազատազրկման։
Հուլիսի 8-ին ՄԻԵԴ-ը վերահաստատեց իր որոշումը, որ Դեմիրթաշի ձերբակալությունը խախտել է նրա իրավունքները: Դատարանը նախկինում հայտարարել էր, որ նրա կալանքի բազմակի երկարաձգումները քաղաքական դրդապատճառներ ունեն և պարտավորեցրել էր թուրքական իշխանություններին Դեմիրթաշի փոխհատուցում վճարել, այդ թվում՝ բարոյական վնասի համար:
Հետևեք մեզ տելեգրամում
