Քննարկվել են զբոսաշրջության ոլորտում հայ-իրանական համագործակցության հեռանկարները

Սաուդյան Արաբիայում անցկացվող ՄԱԿ Զբոսաշրջության համաշխարհային կազմակերպության (UNWTO) Գլխավոր ասամբլեայի 26-րդ նիստի շրջանակում ՀՀ էկոնոմիկայի նախարար Գևորգ Պապոյանը հանդիպել է Իրանի Իսլամական Հանրապետության մշակութային ժառանգության, զբոսաշրջության և ձեռարվեստի նախարար Սեյեդ Ռեզա Սալեհի Ամիրիի հետ: Այս մասին հայտնել է ՀՀ Էկոնոմիկայի նախարարությունը:

Գևորգ Պապոյանը նշել է, որ Հայաստանը կարևորում է Իրանի հետ դարավոր համագործակցության արդյունքում ձևավորված սերտ համագործակցությունը։ Զրուցակիցները քննարկել են երկու երկրների միջև առկա հարաբերությունների ընդլայնմանը վերաբերող հարցեր, այդ թվում՝ զբոսաշրջության ոլորտում փոխգործակցության հեռանկարները, երկու երկրների մշակութային հարուստ ժառանգության և զբոսաշրջային մեծ ներուժի վերաբերյալ ճանաչելիության բարձրացմանը, զբոսաշրջային հոսքերի ավելացմանը վերաբերող մի շարք թեմաներ։

Ըստ իրանական կողմի տարածած հաղորդագրության՝ Սալեհի Ամիրին հայտարարել է, որ Իրանի նախագահ Մասուդ Փեզեշքիանի Հայաստան այցից հետո հայ-իրանական զբոսաշրջային հարաբերությունների նոր փուլ է սկսվել։ Նա շեշտել է, որ Պերսեպոլիսում Հայաստանի ազգային ֆիլհարմոնիկ նվագախմբի համերգը մեծ հետաքրքրություն է առաջացրել և ցույց է տվել հայ ժողովրդի հետաքրքրությունն Իրանի մշակույթի նկատմամբ։ Նախարարը նշել է, որ նպատակ ունեն զարգացնել հատկապես ավտոմեքենայով և ընտանեկան զբոսաշրջությունը, ինչպես նաև ստեղծել համատեղ հանձնաժողով՝ ծրագրերի իրականացումը վերահսկելու համար։