Եվրասիական տնտեսական հանձնաժողովի (ԵՏՀ) առևտրի նախարար Անդրեյ Սլեպնևը Նյու Դելիում հանդիպել է Հնդկաստանի առևտրի և արդյունաբերության փոխնախարար Ռաջեշ Ագրավալի հետ։
«Արմենպրես»-ի փոխանցմամբ՝ քննարկվել են երկկողմ առևտրատնտեսական հարաբերությունների զարգացումը, հետագա համագործակցության ուղիներն ու ապրանքաշրջանառության ընդլայնման հնարավորությունները։
Հանդիպման հիմնական թեման եղել է ԵԱՏՄ-Հնդկաստան ազատ առևտրի համաձայնագրի շուրջ ընթացիկ աշխատանքները։
Կողմերն անդրադարձել են բանակցային գործընթացի տեխնիկական փուլին՝ շեշտելով, որ համաձայնագրի կնքումը կարող է նոր հնարավորություններ բացել ինչպես եվրասիական, այնպես էլ հնդկական շուկաների համար։
«Մեծապես կարևորում ենք երկկողմ առևտրային նոր հարաբերությունների հաստատումը։ Մեր նպատակն է հնարավորինս կարճ ժամկետում հասնել փոխշահավետ պայմանավորվածությունների»,- նշել է ԵՏՀ առևտրի նախարար Անդրեյ Սլեպնևը։
Հնդկական կողմը ևս ընդգծել է համագործակցության ընդլայնման և նոր գործիքների ստեղծման անհրաժեշտությունը՝ նպաստելու ապրանքների և ծառայությունների շրջանառության աճին։ Կողմերը պայմանավորվել են շարունակել ինտենսիվ բանակցությունները։
Հետևեք մեզ տելեգրամում
