Տարածաշրջանային հարցերով փորձագետ Արմեն Պետրոսյանը մեկնաբանել է Հայաստանի վերաբերյալ Թուրքիայի արտաքին գործերի նախարար Հաքան Ֆիդանի վերջին հայտարարությունը։
«Նոյեմբերի 18-ին Թուրքիայի Ազգային մեծ ժողովի պլանավորման և բյուջեի հանձնաժողովում արտաքին գործերի նախարար Հաքան Ֆիդանի՝ Հայաստանի հետ հարաբերությունների կարգավորման վերաբերյալ հիմնավորումները, որոնք նույն իմաստային տրամաբանության մեջ էին՝ քողարկված Ադրբեջան-Հայաստան գործընթացով, վերահաստատում են թեմայի հետ կապված Թուրքիա-Ադրբեջան մարտավարության անփոփոխելիության և դրա առանցքային պատճառի հանգամանքը։
Մասնավորապես հատկանշական է Ֆիդանի հետևյալ ընդգծումը. պայմանագրում չի ներառվել երկու հարց՝ «Զանգեզուրի միջանցքի» հարցը և Հայաստանի սահմանադրությանը վերաբերող որոշ հարցեր։ Երբ այս հարցերը լուծվեն և Ադրբեջանը ստորագրի վերջնական համաձայնագիրը, Թուրքիան կբացի իր սահմանային անցակետերը Հայաստանի հետ։
Վերոնշյալի համատեքստում հերթական անգամ վերահաստատվում է այն հանգամանքը, որ չնայած TRIPP-ի սկզբունքների ամրագրմանը, այնուամենայնիվ, թե՛ Ադրբեջանի, թե՛ նաև Թուրքիայի համար չափազանց կարևոր են երթուղու կարգավորման իրավական, ֆինանսատնտեսական դետալները։ Եվ Հայաստանի հետ վերջնական կարգավորման հարցը երկու կողմերն էլ անընդհատ օգտագործելու են որպես լծակ՝ թե՛ Հայաստանի և թե՛ շահակից այլ դերակատարների դիրքորոշումների վրա ազդելու համար, մինչև կստանան առավելագույն հնարավոր լուծումը»։
Հետևեք մեզ տելեգրամում
