Գերմանիան կնքել է իր պատմության ամենամեծ պաշտպանական գործարքը Իսրայելի հետ

Իսրայելը Գերմանիային է հանձնել «Arrow 3» հակահրթիռային պաշտպանության համակարգը՝ Բեռլինից հարավ գտնվող Հոլցդորֆ ավիաբազայում տեղի ունեցած արարողության ժամանակ, կնքելով երկրի պատմության մեջ ամենամեծ պաշտպանական արտահանման գործարքը։

Համաձայնագրի արժեքը կազմում է 4 միլիարդ եվրո ($4,6 միլիարդ)։ Սա առաջին դեպքն է, երբ «Arrow 3» համակարգը տեղակայվում է ԱՄՆ-ից և Իսրայելից դուրս։

Համալիրը տեղակայված է Հոլցդորֆի բազայում, հետագայում սպասվում են լրացուցիչ տեղակայումներ։ Իսրայելական կողմից արարողությանը ներկա են գտնվել Պաշտպանության նախարար Ամիր Բարամը և Պաշտպանական հետազոտությունների և զարգացման վարչության ղեկավար Դանի Գոլդը։ Գերմանիայի պաշտպանության նախարար Բորիս Պիստորիուսը և կանցլեր Ֆրիդրիխ Մերցը, ըստ ԶԼՄ-ների, չեն մասնակցել միջոցառմանը։

«Arrow 3»-ի վաճառքը դարձել է European Sky Shield նախաձեռնության մի մասը, որի նպատակն է ամրապնդել Եվրոպայի հակահրթիռային պաշտպանությունը՝ ռուս-ուկրաինական պատերազմի ֆոնին։

Համալիրի հանձնումը տեղի է ունեցել՝ չնայած ՄԱԿ-ի փորձագետիտական խմբի հայտարարություններին, որոնք զգուշացրել են, որ պաշտպանական ընկերությունները, որոնք շարունակում են համագործակցությունը Իսրայելի հետ, «ռիսկի են դիմում դառնալ միջազգային մարդասիրական իրավունքի լուրջ խախտումների և մարդկության դեմ ուղղված հանցագործությունների հանցակիցներ»։

Թել Ավիվին զենք մատակարարողների և, այդպիսով, ռազմական հանցագործությունների հանցակիցների ցանկում ընդգրկվել են այնպիսի ամերիկյան և եվրոպական ընկերություններ, ինչպիսիք են՝ BAE Systems, Boeing, Caterpillar, General Dynamics, Lockheed Martin, Rheinmetall AG, ThyssenKrupp և այլն։ ։ Փորձագետները շեշտում են, որ Միջազգային դատարանի որոշման ֆոնին զինամթերքի ոլորտում համագործակցությունը կարող է դիտարկվել որպես միջազգային իրավունքը խախտող գործողություններին գիտակցաբար աջակցելու դրսևորում։