Օրեր առաջ Դամասկոսում Իրանի հյուպատոսության վրա տեղի էր ունեցել հարձակում, որի արդյունքում սպանվեց Իրանի Իսլամական հեղափոխության պահապանների կորպուսի (ԻՀՊԿ) ավագ հրամանատար, բրիգադային գեներալ Մոհամմադ Ռեզա Զահեդին:
Մոհամմադ Ռեզա Զահեդիի հետ սպանվել է ևս վեց զինվորական՝ այդ թվում իրանցի մեկ գեներալ:
Պաշտոնական Թեհրանը հարձկման և սպանության մեջ մեղադրում է Իսրայելին: Իրանի գերագույն առաջնորդ այաթոլլա Ալի Խամենեին հայտարարել է, որ Թեհրանը կստիպի Իսրայելին «զղջալ» այս հարձակման համար:
Ո՞վ էր Մոհամմադ Ռեզա Զահեդին:
Մոհամմադ Ռեզա Զահեդին ծնվել է 1960 թվականի նոյեմբերի 2-ին Իրանի Սպահան քաղաքում։ ԻՀՊԿ-ին միացել է դեռևս 19 տարեկան հասակում՝ Իրանի իսլամական հեղափոխությունից երկու տարի անց:
Զահեդին զբաղեցրել է կարևոր պաշտոններ, որոնցից հատկանշական է 2005 թվականը, երբ նա կարճ ժամանակով եղել է Հեղափոխության պահապանների օդուժի հրամանատարը: Այնուհետև երեք տարի ժամկետով իրականացրել է ԻՀՊԿ ցամաքային զորքերի հրամանատարությունը: Իսկ 2016-ից 2019 թվականներին Զահեդին եղել է նաև ԻՀՊԿ-ի օպերատիվ գծով տեղակալը։
Մոհամմադ Ռեզա Զահեդին 2008 թվականից իրականացրել է Ղոդս ուժերի հրամանատարությունը՝ Լիբանանում և Սիրիայում գործողություններ ղեկավարելով:
Ուշագրավ է, որ Զահեդին Ղասեմ Սոլեյմանիից հետո երկրորդ կարևորագույն անձն է համարվում, որը սպանվեց:
Զահեդին երկար ժամանակ է, ինչ գտնվում է Իսրայելի թիրախում:
Իսրայելի հետախուզությունը երկար ժամանակ է, ինչ հետևում է Մոհամմադ Ռեզա Զահեդիին: Բազմիցս իսրայելական լրատվամիջոցները հրապարակել են Զահեդիի լուսանկարները և նրան համարել Իսլամական հեղափոխության պահապանների կորպուսի «Ղոդս» ուժերի բարձրաստիճան պաշտոնյաներից մեկը:;
Հարձակման հետևանքով սպանվել է նաև Զահեդիի տեղակալ, բրիգադային գեներալ Մուհամադ Հադի Հաջի Ռահիմին։
Այսպիսով՝ Մոհամմադ Ռեզա Զահեդին Իսրայելում ընկալվել է այնպես, ինչպես Իսրայելի կողմից սպանված նախկին հրամանատար Իմադ Մուղնիեն, ԻՀՊԿ Ղոդս ուժերի հրամանատար Ղասեմ Սոլեյմանին և Հեզբոլլահի առաջնորդ Հասան Նասրալլահը:
Հետևեք մեզ տելեգրամում
