Լաթաքիայում ցուցարարներն այրել են Թուրքիայի դրոշով թղթեր՝ բողոքելով Սիրիայում թուրքական օկուպացիայի դեմ, հայտնում է «Голос Курдистана» տելեգրամյան ալիքը։
Սիրիայի ալավիները կիրակի դուրս են եկել առափնյա Լաթաքիա քաղաքի փողոցներ՝ ի նշան բողոքի Հոմսում մզկիթի պայթյունի դեմ, որի հետևանքով երկու օր առաջ ութ մարդ էր զոհվել։
Տարածքում տեղակայվել են անվտանգության ուժեր, որոնք միջամտել են՝ դադարեցնելու բախումները ցուցարարների և հակընդդեմ ցույցի մասնակիցների միջև։ Դեպքին ականատես է եղել AFP-ի թղթակիցը։Կիրակնօրյա ցույցը տեղի է ունեցել հոգևոր առաջնորդ Ղազալ Ղազալի կոչից հետո։ Նա Սիրիայի և արտերկրի ալավիների իսլամական խորհրդի ղեկավարն է, որը շաբաթ օրը մարդկանց կոչ էր արել «աշխարհին ցույց տալ, որ ալավիական համայնքին չի կարելի նսեմացնել կամ մեկուսացնել»։ Ցուցարարները կրել են Ղազալի լուսանկարները և նրան սատարող պաստառներ՝ վանկարկելով պետական իշխանության ապակենտրոնացման և տարածաշրջանային որոշակի ինքնավարության կոչեր։
Սիրիայի նախագահ Բաշար Ասադի (որը նույնպես ալավի է) հեռանալուց հետո Մարդու իրավունքների դիտարկման սիրիական կենտրոնը և Հոմս նահանգի բնակիչները հայտնել են փոքրամասնությունների ներկայացուցիչների առևանգումների և սպանությունների մասին։
Երկրում տեղի են ունեցել նաև միջկրոնական բռնության մի քանի արյունալի բռնկումներ։ Մարտին Սիրիայի առափնյա շրջաններում տեղի են ունեցել ալավի խաղաղ բնակիչների զանգվածային սպանություններ, ընդ որում՝ իշխանությունները մեղադրել են Ասադի զինված կողմնակիցներին՝ անվտանգության ուժերի վրա հարձակվելու միջոցով բռնություն հրահրելու մեջ։
Հետևեք մեզ տելեգրամում
