Հայաստանը ներկայումս գտնվում է Մեծամորի ատոմակայանի շահագործման ժամկետը մինչև 2036 թվականը երկարաձգելու փուլում, որից հետո նախատեսվում է ևս մեկ փուլ՝ կայանի գործունեությունը լրացուցիչ 10 տարով երկարացնելու համար։ Այս մասին ԱԺ-կառավարություն հարցուպատասխանի ժամանակ հայտարարել է ՀՀ վարչապետ Նիկոլ Փաշինյանը, փոխանցում է Armenpress-ը:
«Մենք հիմա գտնվում ենք Մեծամորի ատոմակայանի գործունեության ժամկետը մինչև 2036թ երկարացնելու ցիկլի մեջ, որից հետո ևս մի փուլ՝ ենթադրվում է 10 տարով ևս հնարավոր կլինի երկարացնել Մեծամորի ատոմակայանի գործունեությունը, այսինքն՝ 2036թ և 2046թ»,-նշել է վարչապետը։
Փաշինյանի խոսքով՝ այդ ժամանակահատվածում կառավարությունը պետք է նոր ատոմակայանի կառուցման վերաբերյալ որոշում կայացնի: Միջուկային ռեակտոր ունենալու հարցը Հայաստանը քննարկում է Ռուսաստանի, Միացյալ Նահանգների, Ֆրանսիայի, Չինաստանի և Հարավային Կորեայի հետ։
«Եվ դա բոլոր մեր գործընկերներին թափանցիկ կերպով ասում ենք։ Դա ճակատագրական ռազմավարական նշանակության որոշում է։ Եվ որոշում կայացնելիս պետք է համոզված լինենք, թե որ առաջարկն է մաքսիմալ համապատասխանում ՀՀ շահերին»,-ընդգծել է Փաշինյանը։
Հետևեք մեզ տելեգրամում
