Իրանին ու ԱՄՆ-ին հաջողվել է մի շարք ուղենիշային սկզբունքների շուրջ հասնել ընդհանուր փոխըմբռնման։ Այս մասին Ժնևում ԻԻՀ ու ԱՄՆ անուղղակի բանակցությունների երկրորդ փուլի ավարտից հետո հայտարարել է Իրանի արտգործնախարար Աբբաս Արաղչին:
Նախարարի գնահատմամբ՝ բանակցությունների երկրորդ փուլն անցել է ավելի կառուցողական մթնոլորտում, քան նախորդը. կողմերն անցել են առավել լուրջ ու առարկայական քննարկումների:
Ըստ Արաղչիի՝ հաջորդ հանդիպման համար հստակ ժամկետ դեռևս չի սահմանվել, սակայն կողմերը պայմանավորվել են աշխատել հավանական համաձայնագրի տեքստերի վրա, փոխանակել դրանք, որից հետո միայն կնշանակվի բանակցությունների երրորդ փուլի ամսաթիվը:
Իրանցի պաշտոնյան ընդգծել է, որ թեև վերջնական ճանապարհային քարտեզ դեռևս չկա, սակայն առկա է ավելի հստակ պատկեր այն մասին, թե ինչ պետք է արվի հետագայում: Արաղչին շեշտել է, որ կողմերի դիրքորոշումները մերձեցնելու համար դեռևս մեծ աշխատանք կա անելու:
Հետևեք մեզ տելեգրամում
