Փետրվարի 24-ին Բաքվում անցկացվելու է Թուրքիա-Ադրբեջան-Վրաստան խորհրդարանների արտաքին հարաբերությունների հանձնաժողովների եռակողմ համատեղ 10-րդ նիստը։ Թուրքական «Յենի Շաֆաք» լրատվական կայքի փոխանցմամբ՝ Բաքվում է գտնվում Թուրքիայի մեջլիսի արտաքին հարաբերությունների հանձնաժողովի նախագահ Ֆուաթ Օքթայը։ Վերջինը լրագրողների հետ զրույցում անդրադարձել Ադրբեջան-Հայաստան խաղաղության գործընթացին՝ նշելով, որ Թուրքիայում անցկացված նախորդ նիստից հետո տարածաշրջանում տեղի են ունեցել կարևոր զարգացումներ և փոփոխություններ։
Նա ընդծգել է, որ Ադրբեջանն ու Հայաստանը նախաստորագրել են խաղաղության համաձայնագրի տեքստը և համաձայնության են եկել TRIPP շուրջ։
Օքթայը, հիշեցնելով, որ Ադրբեջանի և Հայաստանի միջև առևտուրն արդեն սկսվել է՝ նշել է. «Ադրբեջանի և Հայաստանի միջև հարաբերությունների կարգավորման սկսումն իր հետ բերում է նաև Թուրքիայի և Հայաստանի միջև կարգավորման գործընթացի մեկնարկ։ Թուրքիայի նախապայմանն Ադրբեջանի և Հայաստանի միջև հարաբերությունների կարգավորումն էր»։
Օքթայի խոսքով՝ Ադրբեջանի և Հայաստանի միջև կարգավորման գործընթացը կապակցվածության տեսանկյունից դրական ազդեցություն կունենա նաև Վրաստանի վրա՝ հավելելով.
«Վրաստանը հիմնական երթուղիներից մեկն է, որը թե՛ երկաթուղով, թե՛ ավտոմոբիլային ճանապարհով Թուրքիան կապում է Ադրբեջանի և թյուրքական աշխարհի հետ»։
Նա ընդգծել է, որ Հարավային Կովկասում ձեռք բերված խաղաղությունը դրական ազդեցություն կունենա ողջ տարածաշրջանի վրա, և նշել, որ անհրաժեշտ է հնարավորինս շուտ ավարտել Ռուսաստանի և Ուկրաինայի միջև շարունակվող պատերազմը։
Թուրք պաշտոնյա․ Ադրբեջան-Հայաստան հարաբերությունների կարգավորման մեկնարկը միաժամանակ խթանում է նաև Թուրքիա-Հայաստան կարգավորման գործընթացը
Հետևեք մեզ տելեգրամում
