Եվրամիության անդամ երկրների արտաքին գործերի նախարարները Բրյուսելում կայացած հանդիպման ժամանակ քննարկել են Հորմուզի նեղուցի անվտանգության ապահովման տարբերակները, սակայն որոշում են կայացրել չընդլայնել իրենց ռազմածովային գործողությունները տվյալ տարածաշրջանում։ Այս մասին հայտնում է CNN-ը:
Որոշումը հաջորդել է ԱՄՆ նախագահ Դոնալդ Թրամփի կոչին, որով նա դիմել էր եվրոպական դաշնակիցներին՝ աջակցելու նեղուցի անվտանգությունն ապահովելու Վաշինգտոնի ջանքերին:
ԵՄ արտաքին քաղաքականության և անվտանգության հարցերով բարձր ներկայացուցիչ Կայա Կալասը երկուշաբթի երեկոյան լրագրողների հետ զրույցում հստակեցրել է միության դիրքորոշումը. «Եվրոպան շահագրգռված չէ անվերջանալի պատերազմով։ Սա Եվրոպայի պատերազմը չէ, սակայն Եվրոպայի շահերն այստեղ ուղղակիորեն վտանգված են»։
Կալասը նշել է, որ Կարմիր ծովում ԵՄ ռազմածովային ուժերը, «Ասպիդես» (Operation Aspides) գործողության շրջանակներում, արդեն իսկ առանցքային դեր են խաղում նավարկության ազատության պահպանման գործում։ Թեև քննարկումների ժամանակ եղել է այդ գործողությունն ուժեղացնելու ցանկություն, սակայն այս պահին «մանդատի փոփոխության հարցում հետաքրքրություն չկա»:
ԵՄ էներգետիկայի հարցերով հանձնակատար Դան Յորգենսենն էլ հայտարարել է, որ միության գլխավոր առաջնահերթությունը քաղաքացիների էներգետիկ ծախսերի կրճատումն է։ Նա կոչ է արել եվրոպական գործընկերներին օգտագործել այս ճգնաժամը որպես հնարավորություն՝ նվազեցնելու կախվածությունը «համաշխարհային էներգետիկ անկայուն շուկաներից»։
Հիշեցնենք, որ Հորմուզի նեղուցը սահմանափակվել է Իրանի կողմից՝ այդ երկրի դեմ պատերազմի մեկնարկից ի վեր:
Հետևեք մեզ տելեգրամում
