Եվրամիությունը լրացուցիչ 140 միլիոն եվրոյի ֆինանսական աջակցություն է տրամադրելու Հայաստանին՝ նպաստելու բարեփոխումների առաջխաղացմանը և երկկողմ համագործակցության խորացմանը։ Այս մասին հայտարարել է ԵՄ ընդլայնման հարցերով հանձնակատար Մարթա Կոսը՝ ՀՀ փոխվարչապետ Մհեր Գրիգորյանի հետ համատեղ հայտարարությունների ընթացքում։
Նա նշել է, որ Հայաստանը վստահելի գործընկեր է Եվրամիության համար Հարավային Կովկասում՝ ընդգծելով տարածաշրջանի աճող նշանակությունը աշխարհաքաղաքական լարվածության պայմաններում, հայտնում է Արմենպրեսը:
«Սա կարևոր տարի է Հայաստանի համար, մայիսին Հայաստանը կհյուրընկալի Եվրոպական քաղաքական համայնքի գագաթնաժողովը, որին կհաջորդի առաջին անգամ երբևէ անցկացվող ԵՄ-Հայաստան գագաթնաժողովը: Սա վկայում է այն մասին, թե որքան է բարձրացել այս տարածաշրջանի կարևորությունը Եվրոպայի համար և որքան է խորացել մեր գործընկերությունը»,- ասել է նա։
Հանձնակատարի խոսքով՝ վերջին տարիներին զգալի աճ է գրանցվել Հարավային Կովկասով անցնող բեռնափոխադրումների ծավալներում, որոնք 2022 թվականից ի վեր քառապատկվել են։ Նրա գնահատմամբ՝ ենթակառուցվածքային ներդրումների շնորհիվ հնարավոր է էլ ավելի մեծացնել այդ ցուցանիշը՝ նվազեցնելով փոխադրումների ժամանակն ու ծախսերը։
Կոսը ընդգծել է նաև, որ ԵՄ աջակցությունը չի սահմանափակվել միայն տնտեսական համագործակցությամբ և դիտարկվում է նաև որպես խաղաղության խթանման գործիք։ Նա ողջունել է Հայաստանի և Ադրբեջանի կողմից խաղաղության ուղղությամբ ձեռնարկված քայլերը՝ կարևորելով տարածաշրջանային կապակցվածության զարգացումը։
Հանձնակատարի ներկայացմամբ՝ «Դիմակայության և աճի» ծրագրի շրջանակում ԵՄ-ն արդեն աջակցել է մոտ 7000 ձեռնարկության և նպաստել ավելի քան 20 հազար աշխատատեղի ստեղծմանը։
«Իրականացվում են նաև ծրագրեր կրթության, սոցիալական ծառայությունների և բնակարանաշինության ոլորտներում, ինչպես նաև աջակցություն է տրամադրվում Լեռնային Ղարաբաղից տեղահանված անձանց ինտեգրմանը՝ ավելի քան 70 միլիոն եվրոյի չափով»,- ընդգծել է Կոսը։
Մարթա Կոսի խոսքով՝ նոր՝ 140 միլիոն եվրոյի աջակցությունը միտված է նաև այն բարեփոխումներին, որոնք անհրաժեշտ են վիզաների ազատականացման գործընթացում առաջընթաց ապահովելու համար։
«Այս միջոցները կնպաստեն այն բարեփոխումներին, որոնք անհրաժեշտ են վիզաների ազատականացման գործընթացում առաջընթաց գրանցելու համար»,- նշել է նա։
Կոսը անդրադարձել է նաև ժողովրդավարական գործընթացներին՝ ընդգծելով, որ ԵՄ-ն պատրաստ է աջակցել Հայաստանին հիբրիդային սպառնալիքների և ապատեղեկատվության դեմ պայքարում՝ ապահովելու ազատ և արդար ընտրությունների անցկացումը։
Նրա խոսքով՝ «որոշ չարամիտ դերակատարներ» փորձել են խաթարել ժողովրդավարական գործընթացները մի շարք եվրոպական երկրներում՝ կիրառելով կիբեռհարձակումներ և ապատեղեկատվական արշավներ։ Այս համատեքստում Կոսը հիշատակել է նաև Հայաստանում նախատեսվող խորհրդարանական ընտրությունները, հայտնում է Sputnik Արմենիան:
«Մենք այստեղ ենք՝ աջակցելու Հայաստանին հիբրիդային սպառնալիքների դեմ պայքարում, որպեսզի ՀՀ քաղաքացիները կարողանան ազատ և արդար պայմաններում և ինքնուրույն որոշել իրենց երկրի ապագան», – նշել է նա։
ԵՄ դիվանագիտության ղեկավար Կայա Կալասը հայտարարել է, թե Հայաստանը դիմել է Եվրամիությանը՝ առաջիկա ընտրություններին հնարավոր արտաքին միջամտությանը հակազդելու հարցում աջակցություն ստանալու նպատակով։ Ի պատասխան՝ ԵՄ-ն հայտնել է 2026 թվականի խորհրդարանական ընտրություններին ընդառաջ 12 մլն եվրո հատկացնելու պատրաստակամության մասին՝ այդ միջոցներն ուղղելով օտարերկրյա տեղեկատվական մանիպուլյացիաների և միջամտության դեմ պայքարին, ինչպես նաև կիբեռանվտանգության ամրապնդմանը։
Մարտի 16-ին Կալասը տեղեկացրել է, որ Եվրամիությունը որոշել է Հայաստան ուղարկել արագ արձագանքման խումբ՝ ընտրություններից առաջ հնարավոր սպառնալիքներին դիմակայելու համար։ Նրա խոսքով՝ այդ որոշումը կայացվել է հայկական կողմի դիմումի հիման վրա։ Ըստ լրատվամիջոցների՝ ԵՄ արագ արձագանքման խումբը Հայաստան է ժամանելու ապրիլի սկզբին, և այն կազմված է լինելու 9-14 փորձագետից։
Հետևեք մեզ տելեգրամում
