Freedom House միջազգային իրավապաշտպան կազմակերպությունը մարտի 19-ին հրապարակել է «Ազատությունն աշխարհում 2026. ավտոկրատիայի աճող ստվերը» զեկույցը:
Նշվում է, որ 2025թ․-ի ընթացքում 54 երկրներում վատթարացել են քաղաքական իրավունքներն ու քաղաքացիական ազատությունները․ միայն 35 երկրներում է գրանցվել բարելավում։
Հայաստանը մասամբ ազատ երկրների ցանկում է և ունի 100-ից 54 միավոր, քաղաքական ազատությունները՝ 40-ից 23 միավոր, քաղաքացիական ազատությունները՝ 60-ից 31 միավոր։ Նախորդ տարի ևս Հայաստանը 54 միավոր ուներ։ Համացանցի ազատության առումով Հայաստանն ազատ երկրների շարքում է՝ 100-ից 72 միավորով։
Հարևան երկրներից Վրաստանը նույնպես մասամբ ազատ երկրների խմբում է՝ 51 միավորով։
Նախորդ տարվա 55 միավորի համեմատ՝ այս տարի Վրաստանը հետընթաց է գրանցել։ Նշվում է, որ Վրաստանում 2024 թվականին սկսված լայնածավալ հակակառավարական բողոքի ցույցերը շարունակվել են ամբողջ 2025 թվականի ընթացքում, նույնիսկ այն դեպքում, երբ ցուցարարները բախվել են անհամաչափ ուժի կիրառման և ոստիկանության կողմից վատ վերաբերմունքի: Երկրի գնահատականը նվազել է 4 միավորով:
Ադրբեջանն ունի 100-ից 6 միավոր և ոչ ազատ երկրների խմբում է․ անցյալ տարի ուներ 7 միավոր։ Երկրի ինդեքսը 100-բալանոց սանդղակով վերջին 20 տարիների ընթացքում 33-ից նվազել է 6-ի:
Հետևեք մեզ տելեգրամում
