Իրանում հակամարտությունը կարող է երկար տևել և կունենա երկարաժամկետ հետևանքներ։ Նման կարծիք է հայտնել Ֆրանսիայի ԱԳՆ-ին կից Եվրոպայի հարցերով նախարար-պատվիրակ Բենջամին Ադդադը, հայտնում է ՏԱՍՍ-ը։
«Ես բյուրեղյա գունդ չունեմ, բայց ամեն դեպքում պետք է պատրաստվել երկարատև պատերազմի, որը կունենա հեռուն գնացող հետևանքներ։ Այս հակամարտությունը շարունակվում է արդեն մեկ ամիս, և այսօր դրանից դուրս գալու ելքեր չեն նշմարվում»,- ասել է նա։
Նախարար-պատվիրակը նշել է, որ Իրանում ԱՄՆ-ի և Իսրայելի պատերազմի հետևանքները զգացվում են ամբողջ աշխարհում։ Նրա խոսքով՝ Ֆրանսիան ավելի քիչ է տուժել տարածաշրջանից նավթամթերքի մատակարարումների խափանումից, սակայն բախվում է վառելիքի գների աճին։
Ադդադը ուշադրություն է հրավիրել այն փաստի վրա, որ ԱՄՆ-ում ևս վառելիքի գների խնդիրը բավականին լուրջ է։
Այս համատեքստում նա քննադատել է ԱՄՆ նախագահ Դոնալդ Թրամփին՝ այլ երկրներին ուղղված նրա կոչի համար, ըստ որի՝ նրանք պետք է ինքնուրույն զբաղվեն Հորմուզի նեղուցի ապաշրջափակմամբ, որով անցնում է տարածաշրջանից նավթամթերքի արտահանման հիմնական հոսքը։
«Դուք չեք կարող ստեղծել խնդիրը, իսկ հետո ստիպել ուրիշներին լուծել այն»,- ընդգծել է նա։
Հետևեք մեզ տելեգրամում
